Eminem-a’n Kid Rock a thawhpui avanga sawiselna a chhanglet

Eminem-a’n Kid Rock a thawhpui avanga sawiselna a chhanglet
Eminem chuan Kid Rock album thar, Kristianna lam hawi ‘Halfway 2 Jesus’ album-a hla ‘Heal My Faith’-ah a aw a thawh ve a, Kid Rock hi politics lamah Donald Trump support-tu a ni a, US politics-ah zaithiam leh milar tam zawkin Donald Trump a awmna party ni lo, Democratic party lam an awn zawkin, an thawm a na zawk bawk nen, Eminem-a’n hetianga Trump-a support-tu a thawhpui avang hian sawiselna a tawng ve ta nghal a ni.
Mahse, Eminem chuan Kid Rock a thawhpui avangin tute emaw a tan zawk tih lantirna lam a nih loh thu sawiin, Zirtawpni kaltaa he album an tlangzarh hnu lawmah social media lamah amah an sawiselna chhangin, “Kan tan lam tihlanna tura ka tih a ni lo, ka thianpa rimawi siam turin ka thawpui mai a ni,” a ti.
Hetianga Eminem-a’n Kid Rock a thawhpui avang hian fans lam pawh a barakaih ve deuh niin a lang a, Eminem hian 2024 US President thlannaah khan Trump-a khingpui Kamala Harris a thlawp thu ualau takin a langtir a, Detroit-a Kamala Harris campaign-naah pawh Donald Trump a sawisel a chu chu a hla ‘Campaign Speech’-ah a tilang. Hetihlai hian Kid Rock chu milar zinga Trump-a support langsar ber te zinga mi a ni ve thung.
Kid Rock leh Eminem hi an inthianthatna hi a rei tawh a, kum 40 vel zet inkawmnel tak an ni tawh, Billboard-in an kawmnaah Kid Rock pawhin Eminem chu politics khawvelah hnuh luh a duh loh thu sawiin, “Politics thil a luhpui ka duh lo bur,” a ti a, politics lam chu an sawi tam ngai lo niin a sawi bawk.
Kid Rock chuan a album thar chu ngaihdamna leh hun tha inpek leh chungchang tarlanna a nih ber thu a sawi a, USA-a inthenhranna awm chu intuamdam tawn tul a tih thu a sawi bawk. Kid Rock chuan a album-ah hian Eminem nen hla dang ‘7 Sins’ pawh sak dun an tum zet tawh nain, he hla hi Lil Wayne nen an sa dun ta zawk niin a sawi bawk.