Enchhin ngentute lakah mark pe sang lo – MPCC president

Enchhin ngentute lakah mark pe sang lo
– MPCC president
Enchhin tura mipui ngentute lakah mark pek san tur a la awm lo hle tih Congress hruaitu Lal Thanzara chuan a sawi.
Mizoram Pradesh Congress Committee chuan Ningani khan Aizawlah local council leh village council inthlan neih zawh taka an party tana dingte hnenah lawmthu sawina cetificate an hlan a. MPCC president chuan VC leh LC inthlana dingte hnenah lawmthu sawiin, development tinah sawrkar kutke an ni a, an tel loin veng chhungah development a kal thei lo, tia fuihin, Pathian tih chunga rinawm taka khawtlang tana thawh hian ram tana thawk an ni tih hrereng turin a chah.
Enchhin ngentu ZPM sawrkarin airport suasam a tum danah enchhin an ni a, political party leh NGO ten mark an pe sang lo hle niin a sawi. Kuthnathawktute ngaihsak leh duhsak bik tura an insawinaah, hmunphiah lei chungchangah pass mark an hmu lo a, sawhthingah pawh an intiam angin an awm lo mai ni loin, hah taka beiseina sang tak nena sawhthing ching a, beiseina sang tak nena enchhintute thinlung an ti na tih a sawi.
“ZPM sawrkar theih chhan ber chu, kum 30 chhunga Congress leh MNF insawrkar chhawk khan ram tan engmah an ti lo an tih kha thalaiten an awih a, an sawrkar theih phah a ni,” Lal Thanzara hian a ti.
MNF pawh inthlan dawn apiangin thutiam ropui tak tak nei thin mah se, economic leh development-ah a hlawhtlinna sawi tur an nei lo nia sawiin, “Independent min tiam a, kan chan chu hmeithai tam tak siam a ni ringawt mai. Kawng chhawng siam min tiam a, kawngchawng siam kan nei loa, leiverh inkalpawhna pawh kaw pakhatmah an verh lo. Cheng 70000-a kuthnathawktute tanpui min tiam a, tumahin 70000 an dawng loa, cheng nuai thum NLUP dawng tawh pawhin in dawng ang, an ti a, tumahin nuai thum chu sawi loh nuai khat pawh kha intiamna atang khan dawng an awm awm lo,” a ti.
Mizoram mipui harh tura sawmin Congress hruaitu chuan, “Intiamna kawrawng mai maiah innghat tawh loin, a thutiama Congress a din thin dan, MNF hnuaiah ram a ralmuang em, hma kan sawm em tih te, ZPM kan hrawn meka kan intiam anga kan awm loh chuan kei chu chief minister nih pawh ka duh loang, titu a CM mek a, an intiam angin an awm em kan en chho mek a ni,” a ti.