Eng chhit man tihsan rawtna hnawl
Mizoram Power & Electricity department-in eng chhit tih san a rawtna chu hemi chungchang ngaihtuah thintu Joint Electricity Regulatory Commission chuan a hnawl a, eng chhit man hi tuna hman mek ang hman chhunzawm a ni ang.
P&E department hian 2023- 2024 sawrkar kum kan hman turah power supply enkawlna’na revenue a mamawh – Aggregate Revenue Requirement (ARR) leh eng chhit man chhutna – electricity tariff bithliah thar sak turin JERC-ah dilna a thlen a. A dilna ang chuan ARR ah cheng vaibelchhe 782.33 bituk sak tur leh hemi hmuchhuak turin tariff hman lai hi zaa 3.15-a tih san turin a dil.
Department rawtna ang chuan, kawlphetha leina atana sum mamawh tlin phak lohna awm chu Mizoram sawrkarin subsidy cheng vbch. 157.90 emaw JERC-in ARR a bituk sak atanga zaa 20.50 emaw, heta a tlem zawk zawk hian a phuhruk sak dawn tih a sawi a. An dil ang chuan, eng chhit man thar tur hi chawhrualin unit khat man Rs. 8.08 vel a ni. JERC hian P&E department sum mamawhna a zirchian hnuin, ARR atan vbch. 567.77 a bituk sak a, hei hi kawlphetha hralhna atanga hmuhchuah tur a ni.
Dilna hi Mizoram State Advisory Committee chuan a ngaihtuah a. Advisory Committee hian tariff sang taka tih san loh theih nise a duh tih a sawi. Tariff tih san dilnaah hian public hearing neih a ni bawk a. Mimal leh pawlho atanga rawtna leh sawiselna siam pali zinga tel pathum leh P&E department-in an chhannate ngaihthlak a ni.
JERC chhut danin, tuna tariff hman lai hmang leh electric vehicle (EV) charging station atana rate thar rawtna atangin 2023-2024 hian vbch. 406.85 leh kawlphetha hman bang ram pawna hralhna atangin vbch. 62.62 P&E department-in an hmuh theih a beisei a, hei hi a vaiin vbch. 469.47 a ni. Hei hian vbch. 98.30 (i.e. 567.77 – 469.47= 98.30) in ARR a phuhru zo loa; tariff tih san a, tariff sanna atangin phuhruk tur a ni. Nimahse, sawrkarin vbch. 98.30 subsidy pe in a phuhruk sak theih dawn avangin tariff tih san hi tul a ti loa, tariff hman lai leh category thar (EV charging station) atana hman tur rate an rawt hi 2023- 2024 chhung atan hmang turin thutlukna a siam a ni.
Kum 2023- 2024 chhung hian Mizorama consumer-te kawlphetha hman tur hi million unit 512.58 vel tura chhut a ni a. Tariff hman mek anga chhutin department-in kumthar hian consumer-te hnena kawlphetha hralhna atangin revenue vbch. 406.85 vel a hmu thei anga, a pumpuia chawhrualin 2023- 2024 chhunga unit khat man tur chu Rs. 7.94 a ni. Kum kalta 2022- 2023 aia 2023- 2024 chhunga kawlphetha hman zat a tam dawn avangin tariff hi tih san ni lo mah se, kumthara revenue hmuh tur hi kumina hmuh tur beisei zat aiin vbch. 11.20 in a tam.
P&E department-in 2023- 2024 chhunga consumer-te eng pekna’n unit khat zelah Rs. 11.44 mamawh tura a insawi laiin, JERC-in ARR a bituk sak atanga chhutin P&E hian eng pekna’n unit khatah Rs. 9.86 a mamawh tura ngaih a ni thung a. Sawrkarin subsidy a pek dawn avangin tlawm zawkin mipui hnenah chawhrualin unit khat Rs. 7.94 vel zelin an pe thei dawn a ni. Sawrkarin consumer-te subsidy a pek sak tur hi chawhrualin unit khatah Rs. 1.92 vel zel a ni.
Electricity Act 2003-in electricity tariff bithliah chungchang hi Electricity Regulatory Commission thuneihna hnuaiah a dah a. Commission hi Mizoram leh Manipur in an intawm avangin Joint ERC tih a ni. Manipur sawrkar pawh eng chhit man hi a ngai ring turin a ti. Power supply enkawl nana revenue mamawh (ARR) hi power hralhna atanga hmuh let tur a nih avangin, electricity tariff hi kumtin ennawn tur a ni a, ARR hmu chhuak turin tariff bithliah thin tur a ni.
-- Advertisement --
# Kum 2023-2024 hian Mizoram pawn lam leh Tuirial HEP atangin kawlphetha million unit (MU) 750 vel lei a tul dawn a, heng atanga leina tur hi chawhrualin unit khat man Rs. 4.48 vel zel a ni.
# 2023-2024 chhungin Mizoramin transmission loss 2% leh distribution loss 22.61% telin kawlphetha MU 675.89 a hmang ang a ni a. Hman bang MU 93.80 awm thei tura chhut niin, phailama hralh dan ngaihtuah tur a ni. Mizorama transmission leh distribution-a kawlphetha luangral tur hi MU 163.31 vel a ni.
# 2023- 2024 hian Mizoramah consumer 301555 awm tura chhut a ni a. Tuna kawlphetha kan hman thin dan ang chuan, domestic consumer zawng zawng 252148 zinga 134077 hian thla khat chhungin unit 60 vel hmang awm turin chhut a ni a, unit 117 vel hmang hi chhungkua 65391 leh unit 200 hmang pel, thla khata unit 209 vel hmang 39362 awm turin chhut a ni.
# Kutir Jyothi consumers chhungkua 45964 leh HT (High Tension) domestic consumer 24 awm tura chhut a ni.