President chuan MP a zawn zata tum sarih ni thei Bhartruhari Mahtab chu 18th Lok Sabha ‘Speaker pro tem’ atan a ruat a. Speaker thlanna chu June 26-ah neih a ni thung ang. Hetih lai hian ruling National Democratic Alliance (NDA) te chuan Deputy Speaker neih an duh tia sawi niin deputy speaker dinhmun hi 10th Lok Sabha (1991) atang khan Opposition tena an la chelh ziah a ni thung.
-- Advertisement --
Tu nge Speaker pro tem?
Constitution Article 94 chuan Lok Sabha thiah a nih veleh Speaker chuan Lok Sabha meeting hmasa ber neih leh hma chuan a office a chhuahsan tur a ni lo a ti. Chumi awmzia chu Speaker office chu ruakin a awm ngai miah lo tur tihna a ni a. Chuvang chuan 17th Lok Sabha Speaker Om Birla chuan 18th Lok Sabha meeting hmasa ber June 24 thleng khan Speaker nihla a la chelh a ni. Constitution Article 95(1) chuan Speaker leh Deputy Speaker hmun a ruah dawnin President chuan Speaker tihtur te ti thei tur Lok Sabha member a ruat ang a ti a.
Chuvang chuan President chuan ‘Speaker pro tem’ chu Speaker full-time a chelh tur thlan a nih hmaa speaker dinhmun chelh tur a ruatta a ni. ‘pro tem’ tih chu ‘lai lawk’ tih emaw hun reilote atan tihna a ni.
Pro tem tih chu Constitution emaw Lok Sabha rules ah ziahlan a ni lo va, mahse conventional term niin ‘Handbook on the working of Ministry of Parliamentary affairs’ ah erawh a chuang thung.
Tih thin dan ang chuan Lok Sabha a member senior ber chu sorkarin thlangin chu chu President-in a ruat mai thin. Speaker pro tem chuan MP dangte chu Speaker full-time tur thlanna neih hmain rinawmna thu a tiamtirin a la lut ta thin a ni. 18th Lok Sabha ah chuan BJP MP Bhartruhari Mahtab chu Speaker pro tem atana ruat a ni.
Speaker leh Deputy Speaker thlan dan?
Constitution Article 93 chuan Lok Sabha chuan Speaker leh Deputy Speaker member te atangin a thlang ang a ti. Speaker thlanna chu President in hun aruat thin a. Independent India ah Speaker tawh phawt chuhtu awm lovin an la tling vek thung a. Deputy Speaker thlanna chu Speaker in a hun a bituk hunah neih a ni thin.
Speaker pawimawhna?
House business a kaihrhuai mai piah lamah Speaker chuan constitutional function pawimawh tak pahnih Bill te Money Bill a certify tu leh MP defection a awmin tenth Schedule hnuaiah disqualification kalpui thei tura thuneihna nei a ni. Heng thilah hian tun hma pawhin Speakers te chuan rorel lai mek te tan zawngin thutlukna an siam a awm fo a ni.
Lok Sabha chuan Speaker chu Bill te Standing Committee enfiah tura dah theihna thuneihna a pe a, chumai bakah member awmtha duh lo te chu ni nga thleng hrem theihna a pe bawk. Referral of Bills te committee hnena pek hi kum 2009-14 a 71% atangin 2019-24 ah chuan 16% ah a tlahniam a ni. Tunah erawh coalition sorkar a awm tak avangin Speaker chuan Bill te chu Standing Committee enfiah tura a pek tam rin a ni ta thung. Kum 2023 khan Opposition MP thahnem tak te chu Speaker in a hnawtchhuak a nih kha.
Eng nge conventions?
Britain ah chuan Speaker chu thlan a nih veleh political party a telna atangin a bang nghal thin. House of Commons a election a hmachhawn dawnin politcal party member ang lovin ‘Speaker in re-election a ngen’ tih anga kalpui a ni a. Hei hi House ah thleibik leh tanbik nei lo a nihna tihchianna anga ngaih a ni.
14th Lok Sabha Speaker Somnath Chatterjee khan a awmna party CPM tena UPA sorkar an thlawpna an hnuhdawha confidence vote lak a nih khan Speaker atanga bang si lovin independent takin chet a la thung.
Tenth Schedule chuan Speaker tana thlantlin annih hnuah political party atanga ban theihna a siam chungin Speaker tumah bang an la awm ngai lo thung a. Speaker atana thlantlin hnua an awmna party atanga banna thehluh chu Speaker independent zia lantirna chiang tak tur a ni.
Deputy Speaker chu Speaker awm loha a aiawh tu constitutional officer pawimawh tak a ni. Kum 1991 atang khan Deputy Speaker nihna chu Opposition te hnenah pek tan a ni a, 16th Lok Sabha thleng khan kalpui a ni a, 17th Lok Sabha ah khan Deputy Speaker neih a ni lo thung.
Indian Constitutional expert te chuan parliamentary democracy humhim zel nan Deputy Speaker chu Opposition ten chelh se an duh a, kuminah ruling ten chelh an duh tih a ni thung.