Parliament session ni hmasa berah Prime Minister chuan Opposition lian ber Congress te chu bei nghalin ‘Emergency’ hunlai behchhanin a kap nghal a.
House thutkhawm neih hmaa media mite a hmuhnaah Prime Minister chuan naktuk June 25 hi Emergency puan kum 50-na chiah a ni a, kan ram democracy a ‘hun duhawm lo ‘ a ni a ti.
Tun hnai lawka India in inthlanpui a hmachhawnah Opposition te chu an che tha hle a, BJP te chuan majority mark pawh an hmu pha lo va. Mahse, Prime Minister chuan NDA a a thawhpui te thlawpna in thuneihna a chang leh tho thung a, mahse, Opposition te chu an tam tham that avangin House floor-ah sorkar chu an chhaih buai hrep thei a ni.
Prime Minister thusawi hmang ang chuan BJP te chuan beisei an pha lo a ni mai thei a, mahse, Opposition te an duh anga chet tir a tum lo hle anga ngaih a ni.
Prime Minister chuan a sorkar chuan mipuite tan term thumnaah a let thuma nasaa hnathawkin result tha zawk a let thuma tha an pek tur thu a sawi a ni.
Tun inthlan kha chhinchhiahtlak tak niin a chhan chu Independence hnua sorkar in term thum a chelhna tum hnihna chauh a ni. “Kum 60 hnuah hun remchang a inhwng a. Mipui ten sorkar chu term thum chelh turin an thlang a, chumi awmzia chu sorkar thil tih, thil tih tumj policy leh inpekna te an pawm a ni. Chuvang chuan mipui te hnenah lawmthu ka sawi” tiin a sawi.
Indira Gandhi sorkar in Emergency a puan chungchang sawiin, “Naktuk hi Indian democracy a hun thim kum 50 na chiah a ni a. |hanghtarte hian Indian Constitution hnawla nih dan te, ram chu jail a dah leh democracy suam a nih dan an theihnghilh dawn lo. Emergency cham 50-naah hian he ramah a thlen tawh ngai miah loh nan ngenna ka siam a ni” tiin a sawi.
Prime Minister chuan a sorkar-ah tute pawh an leng vek dawn tia sawiin mahse Opposition te chu vau nghal thungin, “India hian Opposition mawhphruhna hlen a mamawh, mipui ten auhla ni lo thil tak an duh, Parliament ah drama leh buaina siam ni lo debate, taimakna te an duh. Opposition te hian mipui te beisei an phak ka beisei,” tiin a sawi.
Ramin MP te atangin beiseina sang tak a nei tia sawiin mipuite hamthat nana theih tawp chhuah turin a ngen bawk a. Prime Minister chuan MP thlan thar te chu a lawmpui thu sawi bawkin MP thlan thar te hian Parliament building tharah thutiam an la dawn a ni.
Prime Minister thusawi leh Congress te a beihna chu Congress president Mallikarjun Kharge chuan nataka chhang let nghalin Prime Minister chuan NEET vanga lungawilohna te, West Bengal a Rel chesual te leh Manipur a tharumthawhna la thleng mek te a sawi zawk an beisei thu a sawi a.
“Opposition te i vau a. Kum 50 kal tawha Emergency te i sawi lang leh a, tun hnai kum 10 chhunga puanloh Emergency i kalpui te i theihnghilh ta em ni” tiin Kharge chuan PM Modi a chhang nghal a, “mipui ten Modiji an hnawl tawh” a ti bawk. Congress chief chuan INDIA Opposition blic te chuan Parliament chhung leh pawnah mipui te aiawhin aw an chhuah dawn tiin a sawi bawk.
Modi-an Opposition bei, Congress-in chhang
Get real time updates directly on you device, subscribe now.
Prev Post
Next Post