Imran Khan, Pakistan prime minster hlui lar zet mai chu thawhlehni khan eiruk thubuai kaihhnawihah man a ni a, thla tam tak chhung man a pumpelh tawh chu a pumpelh thei ta bik lo a ni.
A hma pawhin man tuma beih tawh niin hlawhchham zel a ni a. March thla khan court-in man tura thupek a chhuahah man tum police leh amah thlawptute Lahore ah an inbei zek tawh bawk.
Capital Islamabad-a court-a kala an man pawh a awlai lo hle. Police officer ruatin riot gear nen hualin vehicle-ah an luhtir thei tawk a ni.
Khan hian thubuai hrang hrang neiin eiru thubuai atanga sorkar laka hel tum tia puh thlengin a nei a, nikum khan a sorkar chu confidence vote hmang paihthlak a ni a, amah man hi beisei lawksa a ni.
Mahse amah thlawptute thinrimna siamsak thungin Pakistan hun rei tak chhung politics buaiin a chimbuai tawh chuan tawp lam a pan hmel loh hle.
-- Advertisement --
Eng vangin nge Khan man a nih?
Pakistan thuneitute chuan Khan chu corruption investigation a thawhpui tha lo tia sawiin hei vang hian an kutah an kawl mek thu an sawi a.
Khan an puhna hi PM a nih laiin politics lama duhsakna kalpuiin chumi vang chuan tham nan ram a la an ti. Chung te chu Britain’s National Crime Agency tena Pakistan a property tycoon lian ber Malik Riaz Hussain pawisa ‘chheprelh’ nia puh an chhuichianna nena inzawmna nei vek a ni a.
Hussian hian ram chu Al-Qadir Trust, Imran Khan nupui pathumna Bushra Bibi din hnenah a pe an ti a. Imran Khan erawh chuan amah an puhna chu hnawlin ram chu charitable thilah a thlawna pek a ni a ti ve thung.
Hussain chuan pawisa chheprelh engmah a neih loh thu a sawi a. Mahse, ram a pek chhan dik tak chu hriatfiah theihin a la awm chuang lo va, tun hnaiah Pakistan’s National Accountability Bureau investigator te hmaah inlanin Al-Qadir Trust case chungchangah thu zawhfiah a ni bawk a, mahse, heng te hi mipui nawlpui hriatah a kimchangin thuneituten sawi chhuahna an la nei lo thung.
Analysts te chuan tunah police kuta a awm mek laiin court chuan Khan lakah hian case hrang hrangah thubuai an siamsak zui an ring a, court hmaa inlan duh lo te, inlan huna inlan lo tih te leh thil chi hrang hrang amah hrem theihna an kalpui thei tura ngaih a ni.
Imran Khan erawh a inpuahchah tha thawkhata ngaih a ni a. Amah man a nih hnu lawkah video a thusawi record lawk chu tihchhuah niin chutah chuan video tihchhuah a nih meuh chuan man a nih tawh tur thu a sawi a ni.
Mahse tuna court tualzawla man a nihna em hi chu Khan emaw a lawyer tena an beisei loh nia ngaih a ni a, a chhan chu tuna amah manna thuchhuah kalpuitute hi police ni lovin paramilitary force, Punjab Rangers te an ni tlat a ni.
Hei tak hi Khan party Pakistan Tehreek-e-insaf (PTI) te chuan army inrawlh tir ngei tih finfiahna tiin an sawi a. Imran Khan an thubuai a neih leh thil kal mekah Army te inrawlhna chhan tur a awm lo an ti a. A hmain Khan hian army te leh spy agency Inter-Service Intelligence (ISI) te chu amah thah tumah a lo puh tawh a, nikum khan amah thah tuma silai hmanga beihnaa a dam chhuak hlauh reng bawk.
Kum 1947-a Pakistan-in independence a hmuh hnuah sipai general ten tum thum lai sorkar paihthla in thunreihna an chang tawh a, army te chuan Pakistan politics-ah a lailum an luahsa reng hrim hrim. Khan ngei pawh Army te thlawpna avanga PM ni theia ngaih a ni a, mahse, cricket star turu thin a nihna te a charisma neih te avangin tun hnaiah Pakistan-in hruaitu a neih tawh zawng zawng te zingah thleng sang ber anga ngaih a ni.
PM nihna a hlih pawhin tam tak te chuan army te nena an inhmuh thiam loh vangah an ngai a. Khan chuan PM atanga paih a nih hnuah army te nasa takin a sawisel zui bawk a. Pakistan ram hmun hrang hrangah kalin rally leh march te neiin mipui tam takin an zui dul dul thin.
Amah man tumna chu a thlaa thla a pumpelh thei a. Chutah intelligence official te chu amah tihlum tumah a puh zui bawk a. Army official thinrim te chuan an khak zui a, amah man a nih hma lawk pawhin dik lo taka puhzui tawh lo turin an ti bawk.
Tunah Khan chu man ni mekin amah thlawptute chuan amry te chuan an tih loh tur an ti an ti a. Mipui thinrimna nasa tak army te lakah awm mekin Pakistan hma lam hun chu sawi lawk theih loh tih a ni bawk.
Pakistan sipaite pawhin Khan man ni May 9 chu ‘hun thim’ tia sawiin lungawi lotena military leh state hmun pawimawhte an bei lui a nih chuan a sawhkhawk na tak a awm ang an ti nghal bawk.
Thil awm dan zel tur?
Khan kaihhnawiha thil chiang lo chuan Pakistan chu a thla a thla chiang lo ruaiin a dah tawh a. Nuclear nei ram mipui maktaduai 231 chuang chennaah hian thil man a sang hle a, economic crisis turu tak tawk mek a ni bawk. Tun hnaiah IMF te nena inchhanchhuak tura inbiaknaah thumum neih theih a la ni lo va, kumin kum tawp hi inthlanpui a hmachhawn hun a ni bawk.
Analysts te chuan Khan manna chuan ngelnghehlohna nasa zawk siamin PM hlui Imran Khan leh establihsment, sorkar emaw army te nena inremna awm thei a tichhe zual an ti.
Pakistan-ah hian party 13 tangrual Prime Minister Shahbaz Sharif kaihhruai a awm mek a, Khan mannaah sorkarin engmah inrawlhna a nei lo an ti ve thung. Mahse, sawiseltute chuan Khan man chu sorkar mek tan hlawkna niin thiamloh chantir a nih chuan inthlanah chuh thei lova siamin a awm dawn a ni an ti ve thung.
Khan hi Pakistan politics-ah cricket-a ropuina neiha a thlen san ang bawka thleng sangin a awm a. Cricketing icon atangin politics langsar berah a inhlangkai chho thei a.
Mahse, a tira Imran Khan thlawptu army te nen an inkar chhe chho tlatin tunah chuan amah duhlotu an ni ta thung. Imran Khan leh Pakistan hma lam hun chu engmah chiang rih lo anga ngaih niin hriat loh tuipui an dai mek tia sawi a ni.