India-in a pangngai aia a let 10-a tam Russia oil lalut
India chuan nikum khan Russian oil a chawkluh chu a dan pangngai aia a let sawma tam a chawlut tiin Bank of Baroda chuan a tarlang.
Moscow atanga man tlawm zawka oil a chawkluh avang hian Asia-a economy lian ber pathumna India hian $5 billion vel a hum thei a ni.
Chutih laiin Khawthlang ram te chuan Ukraine a run avangin Russian oil leh gas te chu an hnar fithla thak thung a.
Russia hian a energy te chu China leh India ram angah te discount rate-in a pe a, heng ram pahnihte hi khawvel ram dang atanga oil chawlut hnem ber ber an ni.
Kum 2021 kha chuan India in crude oil a chawkluh atanga 2% chauh chu Russian oil a ni a, tunah erawh 20% lawih a tling tawh tiin Bank of Baroda chuan a sawi.
Nikum financial year kha India chuan Russia atangin oil a lei tam sauh a, kha vang khan crude oil tonne khat zelah $ 89 a hum thei a ni.
US leh Europe te chuan India chu Russian oil man tlawm zawka chawlut lo tura an ngen chungin a zawm lo. New Delhi chuan tun thlengin Russia-in Ukraine a runna chu demna thu a la sawi duh lo bawk.
India chuan a oil lei chu chhan tlatin a ram chu energy chawkluha innghat niin mi maktaduai tel rethei bakbera awm an nih mek laiin oil man sang zawkin a lei thei lo a ti hmiah thung.
Ukraine indona thlen hnuah Europe chuan India aiin Russia atangin Europe-in energy a let rukin a chawlut hnem zawk tiin India External Affairs Minister S. Jaishankar chuan nikum khan TV interview-ah a sawi bawk a.
“Europe hian an tana harsatna nasa zawk awm lo tawkin an chawkluh an titlem mai a ni,” a ti bawk a. “Principle ang zawnga an kalpui a nih si chuan eng vangin nge Europe-in indo tan ni phatah an energy chawkluh an tihtlem nghal loh?” tiin zawhna a siam zui bawk.
Ukraine indona chuan ziaawm lam a pan hmel loh avangin Russia chuan Asia ram lian te hnenah energy man tlawm zawkin a hralh chhunzawm zel tura ngaih a ni.
India oil refiners te chuan an theih chhung chu oil man tlawm zawkin an chawlut ang a, Russia laka hrekna hlih a nih hunah chuan an kal dan pangngaiin an kal leh mai ang, tiin Vandana Hari, energy analysis firm Vanda Insights chuan a sawi.