Prime Minister Narendra Modi chuan Inrinni khian a tum thum nan rinawmna thu tiamin prime minister a ni leh dawn tia sawi a ni a, chutiang a nih chuan India prime minister hmasa ber Jawaharlla Nehru hnua term thum prime minister ni leh thei hmasa ber a ni dawn a ni.
Prime Minister Modi chuan Rashtrapati Bhavan-ah President Droupadi Murmu hmu in PM nihna atanga a banna a thehlut bawk a, chutihrual chuan sorkar a siam theih thu a hrilh nghal bawk.
Modi party Bharatiya Janata Party te chuan kum 2014 Lok Sabha inthlanah khan seat 282 an la a, kum 2019 inthlanah seat 303 la in kuminah erawh seat 240 chauh an la thei a, majority mark 272 an phaklohna chu 32 lai a ni. Hei vang hian National Democratic Alliance a tel member te seat 53 chu term thum chelh nan mamawh a ni ta a ni.
Modi chuan Uttar Pradesh-a Varanasi atangin Congress Ajay Rai chu 1.5 lakh vote chuanga hnehin tihian temple town atang hian MP tum thum atana thlan tlin a ni ta bawk.
Modi chuan NDA ten sorkar a tum thum nana an siam ngei tur thu sawiin inthlan chu ‘khawvel democracy ram lian ber tana hnehna a ni’ tia sawiin Union Cabinet inhmuhkhawm hnuhnun ber a kaihhruai zui bawk.
-- Advertisement --
NDA-ah kan awm
TDP supremo N Chandrababu Naidu chuan an party chu NDA a tel an nih thu sawiin National Democratic Alliance meeting New Delhi a neihah a tel tur thu a sawi a. Meeting hi nizan lam khan neih a ni.
“NDA a tel kan ni a, NDA meeting-ah ka tel dawn a. Eng emaw thil thleng a awm a nih chuan ka hrilh ang che u” tiin Delhi a tlawh hma in a sawi.
Naidu hian kum 2002 khan post-Godhra riot thlen hnuah Naidu chuan Modi chu Gujarat chief minister atanga bang turin a lo nawr tawh a. Chumai bakah kum 2018 khan Andra Pradesh special cateogory status pek duh loh avangin Naidu chuan NDA a lo chhuahsan phah tawh a ni.
Tejashwi Yadav leh Nitish Kumar
Nimin khan Rashtriya Janata Dal (RJD) leader Tejashwi Yadav leh JD(U) leader Nitish Kumar te chuan thlawhna pakhatah chuangin New Delhi an pan dun a. An pahnih hian NDA leh INDIA bloc meeting neihnaah tel tum ve ve an ni.
Bihar bikah BJP leh JD(U) te chuan seat 12 ve ve an la a, Chirag Paswan’s Lok Janshakti Party (Ram Vilas) ten seat nga la in, RJD ten seat 4 chauh an la thung.
Bihar-ah hian vote share BJP ten nei sang berin 20.51 an nei a, JD(U) 18.53% te ai pawhin an sang zawk a, mahse, candidate te hnehna chan lamah chuan JD(U) ten an tumpuite an hnehna a sang zawk thung.