England-ah mosque hal, mipa pahnih zawng mek
Tun hnai lawka Judate inkhawmna, synagogue-a mi beihna a thlen hnuah England chhim lama mosque hal leh a ni a, police chuan he thil hi ‘huatna vanga beihna’ anga ngaiin an chhui mek tih an sawi.
Officer-te hi Inrinni zan tlai tawh takah khan chhim lam tuipui kam khua, Peacehaven-a mosque-a kangmei chhuak vanga koh an ni.
Tumah inhliam an awm lo va; mahse, mosque hma lam atanga luhna leh a bula lirthei inhung a chhia.
He thil thlen hnu lawkah hian Sussex Police chuan rinhlelhawm mipa pahnih, a dum veka inthuam, hmai tuam bawk thlalak an tichhuak a, mipuite chu anmahni hriat chhuah an nih theih nana pui tur leh tute nge an nih hria chuan hrilh tura ngenna an tichhuak.
Detective Inspector Gavin Patch-a chuan mosque hal chu ‘mi tam takin him lo nia an ingaih theihna tura mawlmang leh rawng taka chetna’ tiin a sawi.
“He thil thleng hi mi nunna tiderthawng theia chetna angin kan chhiar a, kil hrang hrang atanga chhuitin a mawhphurtute hriat chhuah ngei kan tum a ni,” a ti bawk.
Ningani kal ta maiah khan hmar lama Manchester khawpuiah synagogue-ah mi beihna thlengin mi pahnih an thi a, mi dang pathumin hliam na tak an tuar tawh bawk a. Officer-te chuan Islamist kal fawrte chetna ni ngeiah an ngai.
Peacehaven mosque thupuangtu chuan ‘tumah hliam tuar an awm lo chu a lawmawm tak zet’ a ti a, ‘tute pawhin inpumkhatna tichhiaa inen hranna leh leh inhuatna rawngkai hnualsuat zel ang u’ tiin a sawi.
“Hetianga mi huatna thil tia chetna hi kan khawtlang leh kan khaw zia a ni lo bawk,” tiin thupuangtu chuan a sawi.
Interior Minister Shabana Mahmood chuan he beihna thleng hi ngaihven a ngai tak zet tih a sawi a. “Britain-a Muslim-te beihna hi Briton zawng zawng leh he ram beihna hi a ni,” tiin social media-ah a tar lang.
Board of Deputies of British Jews President Phil Rosenberg-a pawhin mosque hal chu demin mipuite chu inpumkhat tlat turin a sawm a. “Rinna hrang hrang neite hian hlauhna awm lova zalen taka pathian biak theihna chanvo an nei a, chumi kawngah chuan kan ram hi a tha hle bawk,” a ti.
“Tun hnaiah engtiangin nge lalram pakhat kan nih theihna lam tihchhiat tumna a awm a; mahse, United Kingdom kan ni a. Inhuatna ang chi hi chu dovin kan kal zel ang,” a ti.