Vur tla nasa vangin Everest mi tam tak tang

Vur tla nasa vangin Everest mi tam tak tang
Mount Everest pang khawchhak lam, Tibet ram chhunga tlang awih panga an inkulhna hmun (campsute)-ah vur nasa taka tla avangin mi 1,000 dawn an tang a, chhanchhuah hna thawh mek a ni tih Chinese sorkar chanchinbuin a sawi.
Khaw mite leh chhanchhuah hna thawktuten vurin a danna then fai tumin an bei a, an tanna hi metre 4,900 chuanga sang a ni.
Tual chhung chanchinbute chuan mi 350 vel chhanchhuah tawh niin Qudang khuaa hruai an ni tih an tar langin niin Reuters news agency chuan a sawi.
Zirtawpni zan atang khan vur a tla nasa hle a, a bikin Tibet0a Mount Everest khawchhak lam awih, tlang lawn mi leh hawi khawthawng thinte tlawh nasat lamah a tla nasa zual.
Tibet-a Blue Sky Rescue team chuan vur tla nasa avanga puan in chhiate hnen atangin kohna an dawng a, hawi khawthawng thenkhat chu vurin an taksa a ei chhiat pawh an awm niin Chinese sorkar chanchinbu chuan a tar lang.
Tingri County Tourism Company chuan Inrinni atang khan ticket an hralh thin leh Everest Scenic Area luhna chu an titawp rih niin Reuters news agency chuan a tar lang.
Tun hnaiah heng lai velah hian khaw awm dan a uchuak hle a. An thenawm, Nepal-ah pawh ni hnih liam ta chhungin ruah nasa taka sur avangin lei min leh tui lian a thleng nasa a, leite pawh tuiin lain mi 47 vel an thi tawh.
China-ah Typhoon Matmo thawkin mi 1,50,000 chuang hmun himah sawn chhuah an ni bawk.
Mount Everest hi khawvel tlang sang ber, metre 8,849-a sang a ni a. Kum tin mi tam takin lawn chhuah an tum a, hetih lai hian a lawn hi a harsa telh telh thung.
Tun hnai kum eng emaw ti kal ta atang khan lawm tum an tam lutuk a, khuarel an tichhe nasa a, chhiatna lian tak tak pawh a thleng nual bawk.