England lam lama khelh leh tur NBA game

England lam lama khelh leh tur NBA game
Kum 2019 hnu lama a vawi khatna atan United Kingdom-ah NBA a kirleh dawn a, nakkum hian London-ah match khat khelh a ni ang a, kum 2027-ah Manchester khuain NBA match khat bawk a thleng ve leh dawn a ni.
London khawpuia an tihpui hmanna hmun hmingthang pakhat O2 Arena chu regular-season game pakhata Orlando Magic leh Memphis Grizzlies-te inhmachhawnna atan tihfel niin, a hun atan nakkum January ni 18, Pathianni ruat a ni.
January 2019-a Washington Wizards-in New York Knicks an hneh kha UK-a NBA game an khelh tawpna ni tawhin, nakkum London game hi kha mi hnua a hmasa lehber tur a ni a; kum 2011 leh 2019 chhung khan London khawpuiah hian NBA match khelh thin a ni.
Kum 2027 hian Manchester khua pawhin a vawi khatna atan NBA regular-season game a thleng ve dawn a, Co-op Live hmuna inkhel turte hi eng team berte nge tih nemngheh a la ni lo a, chu mi kum season an tan hmain tarchhuah a ni ang.
He khawpuiah hian October 2013 daih tawh khan Oklahoma City Thunder leh Philadelphia 76ers chuan pre-season match khat an lo khel ve tawh a; kha mi tum khan an khawpuiaindoor entertainment venue lian pakhata khelh niin, tunah chuan kha hmun kha AO Arena tih a ni tawh nghe nghe.
London Mayor Sir Sadiq Khan chuan kum thara basketball match lian an thlen tur chungchang sawiin, “London khua hi tunah chuan tu ma el phak rual lohin khawvel infiamna khawpui ber a ni ta a, The O2 ngei maia January 2026-a NBA kan mikhual tur hian khawvel huapa kan nihna chu a nemnghet chiang mai awm e,” a ti.
Greater Manchester mayor Andy Burnham pawhin an khawpui huam chhunga NBA match an dawl tur lawmawm a tih thu sawi chungin an kawtkai ngeia khawvel basketball player tha ber berte inkhel an thlir thei tur phurawm a tih thu a sawi ve bawk.
NBA hian kum 2026, 2027 and 2028 khian Europe khawmualpuiah game hnih theuh an nghat dawn a; Europe khawpui lian zingah hian nakkuma game khat dawl tur Berlin pawh telin, kum 2027-ah Paris-in an thleng ve leh ang a, kum 2028-ah pawh he khawpui pahnih hian match khat ve ve an thleng leh ang.
Kum 2027 leh 2028-a European match khel turte hi a kum zel season tan hmaa puan fel hman tura dah a ni.
2025-26 NBA season hi October ni 21, Thawhlehnia tan tur a ni.