England leh Italy an chak

March 26, Pathianni zan khan Euro 2024 khel tur zawnna khelh chhunzawm a ni a. An khelh hmasak bera Italy hnehtu England chuan Wembley Stadium-a an mikhual Ukraine chu si hnih faiin an hneh a, group C-ah hma an hruai chhunzawm zel. Inkhel dangah an khelh hmasak bera tlawm Italy an insiamtha a, Mimuala an hmachhawn Malta chu si hnih faiin an hneh ve bawk.
Harry Kane a kal fal zel
Ninga zanah Italy laka goal khat thun Harry Kane chuan Wembley-a Ukraine an hmachhawn tumin goal khat a thun leh a, England tana goal thun hnem ber a nihna tizau in, a kal fal zui zel.
England hian Wembley Stadium-a an mikhual Ukraine lakah an khel tha viau a, goal erawh beisei angin an thun hma thei lo thung. Minute sariha darkar chanve an khelh chuanna chiahah captain Harry Kane chuan Bukayo Saka siamsak atangin hmahruaina goal a thun. England tan goal thun tam lama Wayne Rooney record lo khum tawhtu Kane hian England tan vawi 121 khelin, goal 54 a thun tling ta chiah a. Record khum har zawk siam a siam belh.
Kane goal thun atanga minute thum hnu lekah goal khatna siamchhuaktu Saka chuan Henderson siamsak atangin Three Lions goal hnihna a thun a. Minute thum chhung leka goal hnih an thun hi Ukraine lakah an chakpui a, Euro 2024 khel tur zawnaah hnehna an chang zawn. Ukraine an hneh leh tak vangin Three Lions hian Group C-ah point ruk hmuin hma an hruai a, an hnuai chiahah point thum hmuin Italy an awm a. Point thum hmuin North Macedonia chu pathumnaah an awm a, Ukraine leh Malta ten point an la hmu ve lo.
Ninga zanah England lakah tlawm a, chhe taka bul tan Italy chu Malta hmachhawn turin Ta’ Qali National Stadium-ah an lenglut a, Minute 27 chhung leka goal hnih an thun chakpui in, point thum an hmu.
European champion Italy tan hian minute 13-na lekah Mateo Retegui chuan hmahruaina goal a thun. Retegui hian ram tan a khelh hmasak berah England an hmachhawn tumin goal a lo thun tawh a. A chetthat chhun-zawmin Malta lakah goal a thun zui leh bawk. Minute 13-naa hmahruai na goal an thun hnu hian minute 27-naah Matteo Pessina chuan Italy goal hnihna a thun zui leh a. Heng goal hnihte hi Malta lakah chak nan an hmang zui ta a ni.
Pathianni zana inkhel dangah inlehthalna lian a thleng a. Kazakhstan chuan an mikhual Denmark lakah si hnih an phur hmasa zet a. Chawlhlawk hmaa si hnih phur tawh Kazakhstan hian 3-2 in an mikhualte an lehthal a, point thum hlu tak an hmu.