Engtin nge i taksain i tana khuanu ruat a hriat dan!

Hmangaih i neih chuan i hormone insiam chhuah dan a danglam nasa thin a, lungphu te a lo rang deuh a, mood a fuh a, kan hlim deuh surh thin. Inchhai vel leh inhmangaihna boruak insuihkhawm phenah hian eng a tak taka thil thleng? Kan ni deuh chem chem a, kan hlim deuh veng veng a, kan hmangaih nen chuan inzawmna eng emaw tak nei angin kan inhria a, thil hi kan hmu dik deuh thlup mai thin.
Eng gne chung zawng zawng chu a lo awmna chhan, a mitmeng emaw, in duhzawng leh nuam tihzawng inang thei vel lutuk emaw te kha a chhan a ni ber lo a nia, hei hi mak i ti dawn, scientist-te chuan mi tu emaw kan ‘duh’ ringawt hma hian, kan taksain angtin emaw tak chet a lo la hmasa thin an ti tlat mai. Chu chu kan sawi fo thin body language an tih hi a ni lo lehnghal.
Kan taksaa thil awm, expert ten ‘love vitamins’ an tih mai hian kan milpui tur hi an lo zawng daih zawk a lo ni. Chuvangin, tu emaw i milpui em em mai, i duh ngawih ngawih mai, inzawmna eng emaw tak nei anga i inhriat khan in body profile a inan deuh vang mai a ni.
Tu emaw nen kan inhip tawn hian, chemical signal a lo awm a, chu chu kan DNA tihchhuah a ni a, chu signal chu kan kawppui awm mi chuan a lo man ve thuai a, kan intawn khan eng emaw tek deuh sek sek kha a awm ta thin a ni.
DNA danglam kan nei theuh a, chu chu mi chi hrang hrang kan awmna chhan pawh a ni, kan gene hian kan pianzia leh personality thlengin awmzia a nei thin a, chutiang deuh bawk chuan human leukocyte antigen complex, HLA an tih mai kan nei a, chu chuan taksain natna a dolet theihna (immune system)-in cell tha leh tha lo a thliar hran theih nan a tanpui a, chutih rualin kan kawppui awm mi tak min zawn saktu pawh a lo ni. Chuvangin ngaihzawng zawnnaah hian mit ringawt hi a lo ni hauh lo, gene lam daih a lo ni!