Engtin nge thingpui i in?

Engtin nge thingpui i in?
Thingpui kan in nasa a, kan in dan tlanglawn ber chu bawnghnute leh chini pawlh a ni. Tunlaiah chuan green tea pawh kan hre lar ta hle a, a in pawh kan tam ta. Green tea hi thingpuife pangngai aia process nasat loh a ni a, antioxidant leh polyphenols a pai hnem zawk a ni.
Thingpui in hi a tha viau a, mahse, bawnghnute leh chini kan pawlh chiah hian a thingpui thatna tur kha nasa takin a tlahniam ta a ni. Green tea in a tha a, green tea hmu pha lo tan thingpui sen hâng in a tha e.
Green tea-ah hi thisen chhuak leh hliam enkawl nan te pawh an hmang thin a, chaw paitawih lamah mi a pui thei a, lung (heart) leh rilru lam hriselna atang thlengin a tha niin Times of India health section chuan a tarlang. Green tea hian metabloism a tichak a, chuvangin rihna paih duh tan a tha a, allergic response a block thei a, taksaa bâwk awm thang tur a timuang thei a, ruh a tichakin, vun a tihrisel a, thawk rimchhe tur thlengin a veng thei a, Parkinson’s disease lakah pawh mi a veng thei.
Green tea-ah chuan catechins, polyphenol a awm a, chu chu lung lam hriselna atan a pawimawh hle. Green tea hian cholesterol chhe chi LDL a tihniam thei a, stroke (thluaka thisenzam chat/block) risk te pawh a tihniam thei. Vun natna chi hrang hrang tan a tha a, ruhseh tan pawh a tha. Green tea hian type-2 diabetes risk pawh a tihniam thei niin zirchianna atangin an hmuchhuak tawh bawk.
Mahse, engkimah hian a lutuk chu a tha chuang lo. Green tea pawh in tam lutuk a tha chuang lo. Tam over lutuka in chuan a tha lo zawngin nghawng a nei ve leh a, chithlah (reproductive function) lama harsatna a thlen thei a, in tam leh lutuk chuan heat stress leh riltam huam huamna te pawh a thlen thei.
Nikhatah engzat nge in tur tih chu bithliah theih chiah a ni bik lo va, mahse, tam over taka in loh tur a ni a, nikhatah thingpui inna no 3-4 vel in chu a tawk viau ang.