Environment-ah thuneihna hmangsual

Pathianin mihring a siam dawn khan, mihring a siam tura chu lei chung zawng zawnga thu neitu tur a nih thu a sawi lawk thlap a. Tichuan mihring chu a siam a, lei chunga thing leh mau, nungcha tinrengte chunga thuneitu atan a ruat nghal thlap a.
Mihring khawsakna tur leh nunna tur engkim paitu kan chenna leilung, a huap zau zawngin environment kan tih tak mai hi Pathianin enkawl tura min hnutchhiah anga kan enkawl loh avangin, enkawl lo pawh ni mai loa a suasam zawnga kan kal chhoh zel avang hian mihringte hi hrem leh chuan ngai lovin keimahni kan inhrem a, hremhmun kan insiam chawp a ni ber a. Kan tawrh phawt loh chuan kan hrethiam thei lo va, tunah chuan kan tuar chho tan ta a ni ber a. ‘Global warming’ avangin khawvel a mangang a, heng hremhmun kan insiam mekte hi Pathianin duat tak leh awmze nei taka enkawl tura min hnutchhiah kan environment te kan enkawl zui loh vang leh, nawmsak kan duh luat vanga kan suasam zel avangin tun hun hi kan thleng ta a, Pathianin thuneihna min pek hi kan hmangsual nasa hle a ni.
Environment pawimawhzia kan hriatchian tawh hnuah pawh hian a siam tha tura tha kan thawh dan erawh a la nep hle a; chhan loh aiah Luka tih ang vel a ni awm e. Thingphun kan intihhmuh a, a parthi awrh zawngin kan hnatlang luai luai a, titha kan inti em em a, keimahni kan inbum lek a ni. A chhan chu, heng kan thingphun let sang tam tak hi kan vatthlu a, kan hal kang dur dur kum tin si a nih hi.
Mithiamten tuihna insiam dan an sawi a, an sawi mek laiin chu tuihna insiamna hnar ber ramngaw chu kan thiat reng bawk si a. Kan tui tlan lai lui tui a lo kam a, ‘nikum aiin a kam nasa, nikum aiin kan zia hret’ tiin tui chim chin kan thlir reng ringawt tawh mai a nih hi.
Kan ram inrelbawlna hna thawk tur ‘sawrkar thar’ a lo piang leh a nih pawhin, eng sawrkar pawhin environment siam that leh hna hi nasa taka a thawh a ngai a ni.