Environment ngaihthah vanga tawrhna

Environment suasam avangin tuihna a kang a, khua a thal laiin lui tui a kang a, tui pump tur a awm tlem avangin kan thla a phang a.
Fur a intan a, ruahtui a han tla a, lui tui a lo pung tan a, mahse tui a nut nasat avangin mihring in tlaka thlitfim hleih theih lohvin a awm leh lawi a. Lui tui a tam pawhin a thlaphanthlak ta tho a nih chu.
Tunhma zawng zawng khan fur laia lui tui nu avangin a thlitfimna lamah buaina em em a awm ngai lo.
Tun hnuah hian enga tinge thlitfim theih loh khawpa kan lui tuite a nut tak em em kan tih chuan, a chhanna chu kan hre tlang vek tawh a. Dan kalha dik lo taka kawng laihna leivung lui kawr lama paih nasat vang a ni tih a lang chiang em em. Engtin nge kan tih zel dawn le?
Hmasawnna hi chu mihring hian kan mamawh, hma sawn zel hi kan tum tur pawh a ni. Chutih laiin hmasawnnain nghawng a neih theih tur lam ngaihtuah lek lova hmasawnna hi bawh huam huam tur erawh kan ni lo tih hi mithiam, a bikin environmental activist ten an sawi thin. An ngaihdan leh rin dan an sawi satliah a ni mai lo va, kum tam tak an lo zir chian hnuah leh, a taka thleng ngei leh tawnhriat ngei atanga sawi an ni thin. Chu chu keini pawh hian a tak ngeiin kan tawng chho mek ta a nih hi!
Tuna kan lui tui nut dan dik lo tak thlentirtu hi kawngpui ngawr ngawr vang hi a ni lo va, kawngpui laihna leivung thehthang dik loh vang a ni a, chu chu dan kalh a ni bawk. State dangah pawh tlangramah kawng zau pui pui an lai thin; mahse keini state anga lui tui in tlak loh khawpa leivung thehthangna ang hi a thleng ve tih kan hre ngai chuang lo; lui tui tibawlhhlawh lovin hmasawnna tha tak an nei thei.
Kawng laihna leivung thehthang danah hian kawng laitute an demawm rualin, a ram leilung fate hi, a bikin sawrkara thuneituten ram leh hnam hnuk an vei loh avanga hetiang thil hi thleng thei a ni a tih theih ang. A tir atangin mahni ram leilung hmangaih tak chungin hna hi vil ni se, hetiang harsatna hi kan tawk lek lovang le.