Eptu tangrualte bial inchan sem dan tur a la buai rih

BIHAR INTHLAN:
Eptu tangrualte bial inchan sem dan tur a la buai rih
Bihar assembly inthlan vote thlak hun tur puan a ni tawh a, hetih mek lai hian eptu tangrual lam chu an dinna tur bial zat insemah an la inlungrual thei lo va. Rashtriya Janata Dal (RJD) leh Congress chu an indawr mek zel.
An inkara sawi fel ngai awm hi bial zat insem piah lamah chakna tur bial nia ngaih thuhmun an neihte insem rual tel a ngai a. Thawhtanni zan khan an thukhawm a, RJD hian Congress hi bial 54 vela dintir an phal a, lehlam hian bial 10 dang tal la chan belh an duh nia hriat a ni.
Thawhtanni zanah hian inremna mumal tak an siam lo nia hriat a ni a, Thawhlehni zan khan an thukhawm tha leh nia sawi a ni a, eng thu nge an neih hriat a la ni lo.
CPI-ML pawhin RJD-in bial 19-a ding tura an rawtna chu an pawm lo ve bawk a, bial 30 tala din an duh a. Party hi assembly leh Lok Sabha inthlan hnuhnung berah khan an che tha hle a, hei vang hian bial tam zawka din ve an duh a ni.
RJD hian Left party-te chu bial 10 pek an tum bawk nia hriat a ni a, anni hi inthlan hnuhnung berah pawh khan bial 10-ah pawh dintir an ni.
Thawhlehni chawhma khan RJD chief Tejashwi Yadav-a chuan Left party hruaitute chu a chenna, a pisa ni nghalah a kawm a, Jharkhand Mukti Morcha (JMM) hruaitute nen pawh an inkawm bawk.
RJD hian Mukesh Sahni-a kaihhruai VIP chu bial 12-a din theihna pek an tum nia sawi a ni a, anni erawh chuan bial 20 chuanga din ve bakah an tlin chuan deputy chief minister chanvo pek an phut tel nia sawi a ni.
JMM, Pashupati Paras kaihhruai RLJP leh IP Gupta kaihhruai Inclusive Party pawhin tangrual party lian pahnih, RJD leh Congress karah hian dinna bial chan ve ngei an tum bawk nia sawi a ni.
RJD hian a chhe berah bial 140-ah tal candidate neih an duh a. An duh zat hi tihniam hretin bial 10 pawhin tawlh se dinna insem hi a awlsam deuh tura ngaih a ni a. An tawlh lo a nih erawh chuan inthian tha leh tanghova inthlan chuh siin bial thenkhatah chuan buaina a awm thei dawn nia ngaih a ni.
Dinna tur bial inchan sem hi tun dinhmunah la harsa mah se inremna a awm thuai dawn niin eptu tangrual hian an sawi thung.
RJD, JMM leh RLJP pathumte bial 135-ah an ding ang a, Congress leh IIP-in bial 58 an insem ang a. CPI-ML-in bial 25, CPI-in bial ruk, CPM-in bial li leh VIP-in bial 15 an chang dawn nia sawi rik pawh a awm tawh tho bawk a ni.
Ruahmanna anga thil a kal tluan chuan INDIA tangrual hian an dinna tur theuh tifelin Yadav-a pawh chief minister atana zawrh tur nia sawi a ni a, hengte hi ni hnih hnu vela tihfel tur niin an sawi bawk.