Balhla kung atangin la duang siamchhuah tum

Balhla kung atangin la
duang siamchhuah tum
Horticulture director CH Lalmuanpuia chuan tunhnaia Horticulture department-in Chief Minister’s Innovation Challenge-a pakhatna an dawnna, balhla atanga la duang siam chhuahna (banana fibre extraction project) dinna tur hmun atana hual, Lunglei district-a Mausen khua chu April 4 khan a tlawh.
He project hnuaia balhla kung atanga la duang siam chhuahna leh chuta tanga thil siam chhuahna – Production Unit dinna tur hmun atana hual lawk chu Mausen khawtlang hruaituten lo kawhhmuhin, Bazar tlang leh Mausen YMA ram chhungah unit one leh unit two-ah thenin bun nise, an ti. Helai hmun hi Mausen khawtlangin hnatlanga vat faiin an lo buatsaih lawk tawh a, vantlang tana hnawk lo leh hmun tlawh nuam taka cheibawl tum a ni.
Horticulture department hotute chuan Mausen khawtlang hruaitute, tlawmngai pawl hruaitute leh balhla chingtu (Mausen Banana Growers Association) te chu he project thil tum leh kalphung an hrilhfiah nghal a ni.
Horticulture director chuan he project hi horticulture hnuaia ramin a mamawh thil chher chhuahna project a nih angin, a duang chhuaktu Horticulture department hian a hmunhma buatsaih bakah project-in a mamawh zualpui infrastructure chi hrang hrang – processing unit, packing house, kudam siam leh a chhawrtu turte tana thiam zirtirna buatsaih chu a hma thei ang bera bul tan an tum tih a sawi.
Balhla chu “district khat, thar chhuah chi khat” (One District One Product) hnuaia Lunglei District ODOP thei a nih angin, Banana Fibre Extraction Project hian hemi kawngah hian hmasawnna a thlen ngei beisei a ni a. He project hi a hlawhtling a nih chuan a khaw neitu Mausen khua bakah Lunglei district chhung leh pawn, Mizoram hmun hrang hranga balhla chingtute tan hamthatna zau zawk a la thlen beisei a ni bawk.