Eslabon Armado & Peso Pluma ‘Ella Baila Sola’ a lar ber

Eslabon Armado & Peso Pluma ‘Ella Baila Sola’ a lar ber
Eslabon Armado leh Peso Pluma te hla hit ‘Ella Baila Sola’ chu kar khat chhunga khawvela hla lar ber niin, Billboard Global 200 chart-ah No.3 atangin No.1-ah a kai a, he chart No.1-a an kai vawi khatna ve ve niin, regional Mexican genre tan pawh a vawi khatna tho a ni. Hetihrual hian regional Mexican tan kar tha niin, Grupo Frontera leh Bad Bunny ‘Un x100to’ pawh chart top 5-ah a debut a, Fifty Fifty ‘Cupid’ chu top 10-ah a lang pha bawk.
Billboard Global 200 hi kar khat chhunga US-a hla lar dan tehna niin, chart ranking siam nan hian ram hrang hrang 200 chuanga official-only streams (subsctiption leh ad-supported audio leh video music services) leh download sales te chu tehna pawimawh a ni.
Eslabon Armado hi California chhuak quartet niin, Peso Pluma hi Mexico chuak a ni ve thung a, Global 200 chart-a an No.1 vawi khatna ve ve a ni a, ‘Ella Baila Sola’ hi Spanish tawng hlang hla a ni a, he chart-a Spanish tawng hlang hla No.1 thei palina a ni bawk.
He hla hi kar khat chhungin ram hrang hrang 200 chuangah stream maktaduai 95.2 leh download sales 3,000 a kai a, hei hi chart-ah a No.1 pui ta a ni. Eslabon Armado lead singer leh ‘Ella Baila Sola’ phuahtu ni bawk Pedro Tovar chuan, “Hetiang khawpa thawm nei ring turin he hla hi kan beisei lawk lo hrim hrim. Ka phuah hlim atangin ka ngaina nghal a, mahse, hetiangin a lar ang tih ka ring pha lo. Ka Instagram story-ah te a preview ka dah a, ni hnih hnuah TikTok-ah a viral ta a, khata tang kha chuan a lar dawn ka ring thiam ta a ni,” a ti.
He chart-a No.1 kar 12 ni thei, Miley Cyrus ‘Flowers’ chu No.1 atangin No.2-ah a tawlh a, Yng Lvcas leh Peso Pluma ‘La Bebe’ chu No.4 atangin No.3 a kai thar a, chart No.1 hlui SZA ‘Kill Bill’ chu No.7 atangin No.4-ah a insawn thar leh ta bawk.
Grupo Frontera leh Bad Bunny ‘Un x100to’ chu stream maktaduai 67.4 leh download sales 4,000 tlingin No.5-ah a debut a, regionakl Mexican sextet Grupo Frontera hi Texas chhuak niin, he chart top 10-a an lan vawi khatna niin, Bad Bunny tan erawh a vawi 13-na a ni ve thung.
South Korean Fifty Fifty ‘Cupid’ chu stream maktaduai 55.2 leh download sales 2,000 tlingin, No.13 atangin No.9-ah a invawrh a, he chart top 10-a an lan vawi khatna a ni. Member pali – Aran, Keena, Saena leh Sio te awmna ‘Fifty Fifty’ hi he chart top 10-a K-pop group lang thei pangana niin, BTS, BLACKPINK, NewJeans leh BIGBANG te an lo lang tawh bawk a ni.