Europa Conference League champion West Ham

June 7, Nilai zan khan Fortuna Arena, Prague, Czech Republic-ah UEFA Europa Conference League final khelh a ni a, inkhel hmuhnawm takah West Ham United chuan 2-1 a Fiorentina hnehin an champion a, kum 43 zet hnuah trophy an la ve ta nge nge. Europa Conference League-ah an champion vangin West Ham hian Europa League an khel phak dawn a. Europa League khel tur zingah table-a hniam ber an ni nghal.
Europa Conference League final vawi hnihnaah English Premier League club West Ham United leh Italian Serie A club lian Fiorentina te an inhnehtawk viau a. Darkar khat chuang zet chu goal thun thei an awm lo. Darkar khat chuang zet goal lut a awm theih loh hnuin hun tawp dawn hnaihah goal thum ngawt a lut ta thung. Penalty aTanga an hmahruaina humhim zo lo mah se Hammers hin hun tawp dawna an goal thun an chakpui a, trophy lian an sual chhuak ve ta nge nge.
Inkhel hmuhnawm takah hian Italian Serie A club Fiorentina an khel Thain, hlauhawm zawkah an Tang a, goal thun hmasa zawkah Tang mah se offside vangin an goal pawmsak an ni lo thung. Europa Conference League trophy Italy-a hawn nawn leh an tumna an puitlin teuh hle a, vanduai zawkah an Tang thung. Final-ah hian goal lut a awm theih loh reng hnuin ball chang tlem zawk leh derthawng zawka ding West Ham in Biraghi hand ball vangin minute 62-naah penalty an hlawhchhuak. He penalty hi Saïd Benrahma chuan awlsam takin a pet goal a, hmahruaina goal a thun.
Goal an chhuah vangin Fiorentina in goal thun ngei tumin Tan an khawh thar a, goal thun thuaiin, si an phur rei lo. Goal an chhuah aTanga minute nga hnu lekah Giacomo Bonaventura chuan top corner-ah chiang zetin a pet goal a, an si phurh a sut. An si phurh an sut vangin an phur thar hluai a, hmahruai let turmin an khingpuite an nawr nasa hle.
Goal khat ve ve an thun hnuin an inhnehtawk zui viau a, goal thun tuma thapui an thawh rualin goal chhuah hlauin an fimkhur dun viau bawk. Hun pangngaiah goal dang a luh belh thei dawn lo emaw tih hnuah London club an che fuh a. Minute 90-naah Jarrod Bowen chuan West Ham hmahruai nawn lehna goal a thun a. He goal hi venghimin an champion pui a. Kum 43 zet hnuah trophy an chawi ve leh ta nge nge.
West Ham hi kum 1980 khan FA Cup-ah an champion a, hemi hnu hian inelna hrang hrangah an champion thei lo ta ngar ngar. EPL-a an chetchhiat em em Tumin Europe lamah a cheTha tlat thung a, Europa Conference League-ah an champion a. Season tharah Europa League an khel phak dawn. Europa League-ah an champion vangin captain Declan Rice chu West Ham player ropui zingah ziah tel a nih reng phah dawn.