Europe-a chefuh thei lo PSG insingsak an ngai tawh em?

Paris St-Germain chuan a zawna season 11-na atan Champions League final an thleng zo lo leh tawh a, Nilaini zan last 16 second leg-ah sihnih faia mualneitu Bayern Munich hneh loin, an kawtkai first leg-a sikhat faia an tlawm tawhna nen khelh hnih belhkhawmah sithum faiin an chak lo a, knockout round hmasaber an paltlang zo lo leh ringawt tawh!
Mak ve deuh chu PSG hian khawvel footballer piang chhuak tawh zinga thiam bera ngaitu ngah ber tih ngam Lionel Messi an kawl hma aiin Argentine an chhawr hnu hian Champions League trophy an hlat zawk!
Kum 2021 August thlaa chhiah paih hnua kum khata pound maktaduai 25 hlawh tura kum hnih chhung kawl tura Messi an lakluh hma season li chhung 2012/13, 13/14, 14/15 leh 15/16 khan PSG hian Champions League quarter-final an lut zat zat a; Argentina captain an chhawr hma chiah kum 2020-21 season-ah phei chuan semi-final hial thlengin, Messi an neih hnu season hnuhnung pahnih 2021/22 leh 2022/23-ah chuan round of 16 an paltlang zo lo ve ve!
Argentine bakah hian kum naupangte ni chunga Paris St-Germain leh France legend tih ngam der tawh Kylian Mbappe leh South American star hraw dang Neymar Junior an kawl chungin Ligue 1 giants hian an awh ber Europe club trophy hlu ber an sualchhuak thei tlat lo a, he team hi a bulthum atanga insingsak an ngai tawh nia ngai pawl an kat nuk tawh!
Nilaini zan Germany ram inkhelah foot-ball chanchina player man to ber pahnih kawltu team hian hliam vangin Neymar an chhawr thei lo a; player man to dang Kylian Mbappe leh football history-a player ropui bera ngaih Lionel Messi-te’n khelh hnih, minute 180 chhungin Bundesliga giants lakah goal an thun zo lo!
Champions League leh PSG hian ngaihven a hlawh rei ta hle a, he boruakah hian Chelsea playmaker hlui Joe Cole khan BT Sport kaltlangin chumi chungchang chu a sawichhuak a, “Paris St-Germain project hi Champions League trophy laka innghat a ni a, an hlawhchham zel rih zawng a ni,” a ti.
Ex-England midfielder Owen Hargreaves pawhin: “Player malkhaia ropui bik an kawl nual a, team angin an inlan thei tlat lo mai hi a zahthlak a, player chungchuang an khawm ruih a, a hnungtawlh zawng zelin he inelna bikah hian an kal tlat si.”
PSG manager Christophe Galtier pawhin tuntuma an hlawhchham lehna hi lung-chhiatthlak tiin a sawi a, an pawm mai a ngaih thu tarlang chungin, “Zirtur lai ber pawh ka hre tawh lo, kan talbuai a ni tawp mai. Goal chu khung hmasa ngat ila game a danglam daih dawn a, kan thun thei ngang si lo,” a ti chuai raih!
Tualchhung lam melh a hun tawh em?
PSG hian kum 2012-a Qatari mihausa sum an hman tan atang khan player leina’n pound vaibelchhe khat tehreng an thehchhuak tling tawh a, neitu thar hnuaiah hian tualchhung lamah chuan an hlawhtling ngei a, Arab mihausa hnuaia Ligue 1 an hmachhawn tawh season 10-ah vawiriat champion-in, domestic cup 12 an hui tling tawh bawk.
An awh ber leh club neitu Qatar Sports Investments-te mangphan Champions League trophy erawh an tan vana rah ang a la ni chhunzawm ta zel a; neitu thar hnuaia an season hmasa paliah khan quarter-final thleng vekin, season hnuhnung pasarihah erawh tum nga last 16 an pel zo lo!
An squad neih tawhho kan en chuan top heavy thiau, superstar attacking talent an tih ang kha an chhawr kumtin thei a, mahse, squad inkhairual leh inbuktawk an nei thei lo lai hi an buaina niin a lang.
Hei hi an dinhmun a nih avangin ram-dang atanga superstar chawkluh vak vak ai hian tualchhung player lakhawmin, inpawh-tawnna leh thawhhona tha nen squad thar din ta zawk se an kang thei zawk ang em tih ngaihdan a piang tan mek.
Cole bawk khan chumi chungchang chu sawiin, “Tunhnai kum 20 liamta chhung khan khawvela player tha ber ber engngemawzat an rutkhawm a, an squad-a French player naupang zawkte chu Europe-ah an tim tlat a, fans nena an inkungkaihna a tha tawk lo a, an nihna tak tak an phochhuak zo lo,” a ti.
Kum 2020 final-a Bayern chakna goal khungtu Kingsley Coman kha Paris tlangval (Parisian) niin, tuntum pawh hian last 16 first leg-ah an khaw club lakah goal a thun leh a; club dang tana Europe-a vul thei Coman-te kha kum 2014 daih tawh khan PSG chuan kawl zui duh loin Germany ramah free transfer-in an chhuahtir mai mai!
Man nei loa PSG chhuahsan zingah Cameroon striker Eric Maxim Choupo-Moting pawh telin, Nilaini zana Messi leh Mbappe-te’n goal an khung theih loh leh laiin a club hlui lamah Bayern goal khatna a thun a, he mite pahnih atang ngawt pawh hian big name ringawt zuan hi PSG tan fuh tawk loa ngai an awm phah!
Bayern midfielder hlui Hargreaves pawh tawngchhuakin, “PSG hian an projecxt kalpui dan hi an ennawn emaw an thlak hlawk emaw a ngai tawh. Paris khua atanga talent tha tak tak hmuh tur a awm reng laiin eng aiah nge Parisian-te hian Salzburg emaw Dortmund emaw Leicester emaw an pan thin? PSG tan he’ng mite hian khel rawh se.
“An khaw player-te chhawr chung hian Ligue 1 an hlawhchhuak thei a, superstar pahnih khat lam ringawt hawi hi bansan a hun,” a ti ve chiah bawk.
Messi, Mbappe leh Neymar-te hi?
PSG all-time top goalscorer thar Kylian Mbappe hi kum 2017-a Monaco atanga pound maktaduai 165-a an lakluh hnu khan PSG lei tawh zinga hlawhtling ber, an lakluh fuh ber niin, karliamta mai khan a club vawn lai tan game 248-a goal 201 thun tlingin he club chanchina goal khung hnember a ni.
2018 World Cup winner hi he team-a Parisian tlemte inphum zinga pakhat niin, Champions League lama an champion theih loh zel chuan khawvela player ropui berte zinga tel duhin chhuahna kawng a zawng hnai mai lo ang tih sawi theih a ni lo!
Chumi chungchangah chuan French journalist Julien Laurens a tawngchhuak a, ani chuan engti kawng maha an chhuahtir a rin loh thu sawiin, “Mbappe hian a contract neih laiah kum khat hmabak a la nei a, chhuah duh pawh ni se chutiang a thlen chu club lamin an remti ngai dawn lo a, an kawl chhunzawm zel ang.
“Champions League-ah a champion thei rih lo ngei mai a, mahse, kum 24 chauh a la ni a, a champion theih loh avanga buai chhe tur a la ni lo. Amah ngei pawhin PSG tana he title la hmasabertute zinga tel chu a hlu bik dawn tih a lo sawi tawh a ni,” a ti.
Kumin nipui thawt laia contract hmang zo tur pakhat chu Messi hi a ni. Kum 35 mi Argentina captain hi cham zui leh duh tura ngaih nia mah se tun thlengin inremna thar a la ziak lo thung.
Record siama Ballons d’Or pasarih dawng tawh Messi hian nipui thawt vawihnih liamtaa Barcelona a chhuahsan hnu khan PSG tan game 64-ah goal 29 thun tling tawh mah se ani meuh pawh hian Paris club cu Champions League lal-lukhum a la khumpui zo bik lo.
Chanchinbumi kan sawi Laurens khan Argentinian hma hun chungchang tarlang telin, “Club lam chuan Messi contract thar chungchang an ngaihtuah kal reng a, mahse, zanin kha chuan a khel tha tawk lo.
“Kan buaina hi a talent kawl lam pawh a ni chiah lo a, a kum tawhah hi chuan counter-attack lam hi a ni a, Leon Goretzka khan pen nga vel atangin a chhaihbuai hman zel a, hetiang leval atan hi chuan a tha tawk tawh lo niin ka ngai,” a ti!
Kum 31 mi Brazil forward Neymar ve thung hian kum 2017 khan Messi hlimzar hnuaia a khawsakna chhuahsanin PSG kha world-record (£200m)-in a zawm a; Paris a thlen hnuah hliamin a tibuai fo a, karliamta mai pawh khan a khup hliam zai a ngaih avangin a season kal lai a tawp fel leh ta rih.
Laurens an tih pa bawkin Brazilian forward chungchang sawi telin, “Nikum khan hralh an tum tawh a, tunah pawh an tum leh ang,” a ti!
Liverpool winger hlui Steve McManaman pawh BT Sport kaltlangin a tawngchhuak a: “Nakumah PSG hi team tha zawk ni hauh dawnin an lang lo.
“Lionel Messi hi a lo upat belh sawt ang a, chutiang bawkin Sergio Ramos pawh. Neymar lah ni se season tawp thlengin a fit hlen hlei thei si lo a; Marquinhos a lo ni leh a; he team-a big player-te hi an chesawn ngei dawn niin a lang.”
Manager thlak lamte hi?
Tun season Ligue 1 title lehzel hi chang zo lo ta se Christophe Gaultier hian a hna a chan mai ang em tih zawhna a piang nghal.
Galtier hi Qatari-ho lo lan hnua an head coach parukna ni tawhin, ani hnuaiah pawh Champions League trophy a la hmin zo chuang lo!
An coach chhawr lai hmaa manager panga zinga pahnih Carlo Ancelotti leh Thomas Tuchel-te kha Paris atanga an kalbo hnuah Europe top trophy la thei khawpin an chawrchhuak a; nikum nipui laia Mauricio Pochettino thlaktu Galtier hi tunhnai thangkhat lian chhunga PSG kuta French title lut tluang lai titawp thei manager pahnih zinga pakhat niin, kum 2021 khan Paris lama he trophy kal ding ngut ngut chu a team enkawl Lille hmangin a tihtawpsak a; tun dinhmunah a ho hian French top flight table-ah PSG chuan anmahni hnaihbertu Marseille lakah point riatin hma an hruaifal mek a, a trophy cabinet-ah Ligue 1 trophy dang a luh leh ngei hmel mek a ni.
Laurens bawkin Paris manager chhawr lai hmabak sawichhuakin, “Tunhnai i reilote herchhuak leh tur hi a pawimawh dawn a, Galtier hian season a hmanliampui ngei a rinawm a, league pawh a hnehpui a rinawm a, season thar tan hunah erawh a office luah lai hi a thut zui tawh ka beiseipui lo,” a ti.
Ex-Everton defender Joleon Lescott pawhin Europe club inelna liana PSG coach-te hlawhtlin theih loh chungchang hi sawiin, “Khawvel football-a coach tha ber ber an ruai chung pawhin an harsatna tawh mek atanga khaichhuak thei tumah an la tawng lo.
“Tuchel khan a hnaih ber a, mahse, a hun kha a rei ta lo a, an harsatna tawh mek hi thil pakhat maia innghat niin ka ngai lo a, thil hrang hrang infawkkhawm niin, tu emaw petchhuaha mithar sengluh lam pawh ni berin a lang lo,” tiin manager-te ngawr ngawr dem theih nia a ngaih loh thu a sawi.
Bayern Munich 2-0 Paris St-Germain
(3-0 aggregate)
Thu dangah kan kual thui ta deuh a, Nilaini zan Champions League round of 16 second leg inkhel thlirkir hlek ila.
Tarlan tawh angin, second half tir lam minute 61-ah Goretzka thawhrah atangin Eric Maxim Choupo-Moting chuan a club hlui lakah Bayern Munich goal hmasa zawk a thun a; minute 90 khelh tlin dawnah substitute Serge Gnabry chuan Cancelo thawhrah atangin chiang zawka mualneitu team chakna goal a thawh ve leh.
Ligue 1 hmahruaitu team hian star rual kawi dum dum chungin vawihnih inkhelhah goal an thun zo lo mai ni loin VAR thutlukna leh offside flag rorelnain chhan lo phei se la khelh hnih belhkhawmah goal li goal nga laia tlawm thei tur an ni!
Allianz Arena inkhelah khan Choupo-Moting-a tauhluh leh hun tawp dawna Sadio Mane goal tur chu hnawlsak niin, Europe-a vawiruk teh meuh champion tawh Bayern tan Kylian Mbappe leh Lionel Messi-te’n hna ropui an thawk zo lo.