Tata SK 710 Fight Night 3 tan zan zanin…

Tata SK 710 Fight Night 3 tan zan zanin…
Zanin dar 8 atang hian Dawrpui Multi-purpose Centre, Aizawlah Tata SK 710 Fight Night 3 zan hmasa zawk tan a ni dawn a, he huna inlan tur Mizo fighter tha pakhat C. Lalhruaitluanga chuan a tumpui tur Assamese boxer Arnab Chirua a knock out tur thu inbuk laiin a sawichhuak!
LPS Pro Fight welterweight champion Hruaia hian round li khelh tluan ngai lovin Arnab Chirua a hneh dawn tih a sawi a; fighter incho pahnih Lalrinngheta leh Nazareth Lalthazuala an intawng bawk ang.
Indian Boxing Council atanga inspector tura ruat Gaive Nagporewala kaihhruaiin Ningani zingah an inbuk fel a, zanin hian inhnek vawi sarih a awm dawn a, round li zel tura ruahman a ni.
Kum 25 mi Hruaia’n professional a luhchilh atangin a bitum a la hnek vek a, vawi nga chak zawn chungin Chirua nen an inhmachhawn dawn a: “Ka inpuahchahna a tha tawk a, ka inringtawk bawk a, round hnih emaw round thumah chuan kan zawh theih ka ring,” a ti.
Fight Night 3-ah Assammese boxer pali an inlan dawn a, professional boxing an khelh vawi khatna tur vek niin, mikhual ni chungin khawtual boxer thate hmaah fiahna an hmachhawn dawn a, Chirua hmabak a hautak viau tura ngaih a ni.
India bantamweight number one Rinngheta’n LPS Pro Fight title kawl mekin, Indian Kickboxing champion leh Mizoram Mixed Martial Arts champion Nazareth Lalthazuala nen an inhnek dawn a, chak an inringtawk dun hle.
Kum 21 mi Rinngheta chuan, “January ni 29 atang khan ka inbuatsaih tan tawh a, chak ngei ka inring a, ka chak ngei bawk ang,” a ti a, Tuipui tlangval hian professional boxing vawi hnih khel tawhin a chak zawn mek a ni.
Muaythai-a tawnhriat nei tel Nazareth-a’n 2022 Pro Fight-ah quarter-final lut mah se professional a khelh hmasak ber tur a ni a, “Bul ka tanna tura India rama number one ka tum thei tur hi ka lawm a, keimahah chona nasa tak min pe a, ka cho viau bawk a ni,” a ti.
Hnehna kawnga kir leh tumin Cherhlun boxer F. Zoramchhana’n featherweight-ah Luangmual Vengthlang fighter Johan Lalrinpuia a hmachhawn dawn.
February ni 4 khan Thailand-ah WBA Asia title chuhin a tlawm a, a hmain Pro Fight final-ah Rinngheta a hneh lo bawk a, tlawm zawn mek chungin hruihrual chhungah Zotea a lut dawn.
Flyweight-ah Pro Fight-a final lut Samuel Lalthlamuana (Saitual) leh C. Lalsiama (Luangmual Vengthlang), feather-ah Omega Lalramdina (Dinthar) leh David Laldanmawia (Lunglei), light-ah Lalruatzela Hauzel (Mission Veng) leh Vanlalringa (Serchhip), welter-ah Jakob HC Biaknienga (Falkawn) leh Stephen Varte (Manipur) an innuai bawk ang.
Pay-per-view tur a ni lo a, LPS 1-ah live-a pekchhuah a ni dawn. A hmuna en tur tan ticket 200 chiah siam a ni a, Rs. 50-a hralhchhuah a ni ang.