EVM te tihchingpen theih a ni lo ti

Election Commission of India (ECI) chuan Thawhlehni (January 7, 2025) khan Delhi Legislative Assembly inthlan hun a puang a. Inthlan hi thawhkhata neihfel tur niin February 5 ah neih a ni ang a, February 8 ah vote chhiar a ni ang tiin Chief Election Commissioner Rajiv Kumar chuan a sawi.
Nomination thehluh hun hnuhnung ber chu January 17 a ni ang a, a tuk January 18 ah nomination enfiahna neih a ni ang a, Candidate te chu January 20 thleng an inhnuhdawhna hun siamsak an ni bawk.
Delhi inthlan neih ni hian Assembly constituency pahnih Milkipur, Uttar Pradesh leh Erode, Tamil Nadu ah bypoll neih a ni dawn bawk a ni.
“Inthlan thawhkhata neih fel tur a ni a. Nilaini a inthlan kan tihkherna chhan pawh mipui te vote thlak tura an chhuah tam theih nan a ni a, hetiang hian maharashtra-ah pawh kan lo ti tawh a ni” tiin Kumar chuan a sawi.
Member 70 awmna Delhi Assembly term hi February 23 a tawp tur a ni a, Delhi ah hian inthlan thawhkhatna neih fel mai thin a ni.
Delhi Assembly inthlanah hian thuang thuma inbeihna a thleng dawn a, BJP. Congress leh Aam Aadmi Party te chu inbei ber tur an ni a. AAP te chuan a zawna term thum chelh tumin inthlan an hmachhawn dawn a, Congress te pawhin National Capital a rorelna chan leh ngei an tum hle. Chutihlaiin BJP te chuan AAP convenor leh Chief Minister hlui Arvind Kwjriwal te chu eiruknaa inhnamhnawih tiin an bei na hle thung.
Chief Election Commissioner Rajiv Kumar chuan press conference a neihnaah India chuan record siamin one billion-plus voter a nei thuai dawn tiin a sawi bawk a.
Kumar chuan kum 2024 kha inthlan nasat kum a nih thu sawiin inthlanhrang hrangah khawvel mipui hmun thuma thena hmun hnih ten vote an thlak a ti bawk a.
“State leh UT pariatah inthlanna kan nei a. Boruak a tha a, voting percentage, people’s particiation leh women’s participation ah te Lok Sabha inthlanah khan record kan siam a ni” tiin Chief Election Commissioner chuan a sawi bawk a.
“Nimin lawkah electoral roll tihchhuah a ni a. Vote nei 99 crore chuang kan awm tawh a, hun reilote hnuah one billion voter kan tling mai dawn a, chu chu voting lama record tur a ni bawk” tiin Kumar chuan a sawi a. Hmeichhe voter 48 crore vel an awm tiin a sawi bawk.
Kumar chuan EVMs te chu tihchingpen theihloh a ni tiin court in tum 42 thutlukna a siam tawh a, chuvangin tihchingpen nia sawi leh thehdarh hi behchhan nei lo a ni tiin a sawi bawk.
“EVMs te hi inthlan hma nisarih velah chauh pekchhuah thin niin chutah pawh a chin engkim agent te kaltlangin candidate te hnenah hrilh hriat thin an ni. Court in tum 42 lai tihchingpen theihloh tiin thuremna a siam tawh a, tihchingpen nia thuthehdarh hi behchhan nei lo a ni” tiin a sawi bawk.
CEC Kumar chuan voter turnout data chu thlak danglam theih a ni lo va, tlailam dar 5 hnuah vote thlak pung thut anga sawi te hi dawt muhlum a ni tiin a sawi bawk a.
“Langtlang taka thil tih hi kan thupui a ni a, guidelines kimchang leh dataset te kan website ah tarlanin a awm vek a ni” tiin Chief Election Commissioner Rajiv Kumar chuan a sawi bawk.