Ex MLA KL Rochama thlah liam

On Feb 9, 2026 11 0

Ex MLA KL Rochama thlah liam
Zoram mi pawimawh KL Rochama, Ex-MLA chu Feruary ni 8 zing lam dar 1 khan a boral a, hemi hian vui liam niin, Tuikhuahtlanga an chenna inah leh BCM Central Church biak inah amah thlahna hun hman a ni.
KL Rochama hi 1972-77 chhung khan MLA a ni a, 1974-77 chhung khan Congress Legislature Party-ah whip leh secretary a ni. Former Legislators Association of Mizoram-ah term sarih president a ni a, Ex-MLA Council of India-ah vice president a ni tawh bawk.
1937-ah Zotlang, Lungleiah a piang a, B Zodinpuii nen 1975-ah an innei. Zirna lamah 1963-a BA a zo a, chumi hnu 1967-ah PU (Science) a zo leh. 1970-ah Union Biblical Seminary, Yavatmal atangin BD a zo bawk.
BD a ni a, Baptist Kohhranah Pro Pastor a lo ni tawh a, 1990-ah Upa a ni.
Pawl hrang hrangah a inhmang a, YMA Sub-Headquarters Lungleiah president hmasa ber a ni a, Mizoram Hockey Association president pawh a ni tawh. MAMCO chairman a ni tawh bawk.
Chanchinbu lamah a inhmang thin a, 1971-74 chhung khan Lungleiah Hun Thar chanchinbu editor a ni. Sap tawng chanchinbu-a news ziak hmasa a ni a, National Herald, New Delhi-ah correspondent a nih thin bakah thuthar thehdarhtu lar UNI-ah pawh correspondent a ni tawh.
Article thahnem tak a ziak a, Mizo tawng leh sap tawngin a ziak thin. Radion leh TV-ah thu a sawi thin bawk. Thusawi thiam a ni a, kohhran lamah pawh thusawi hi a rawngbawlna pawimawh a tling.
A hun hnuhnung lamah a bawrhsawm a, 2022 October atang khan a inkhawm meuh tawh lo. January ni 16-ah khan a chauh deuh avangin Ebenezer Hospital-ah luhpui a ni a, pneumonia a lo nei tih hriatchhuah a ni. Theihtawp chhuaha enkawl a nih laiin February ni 8-ah a chawl ta a ni.