Exchange program-ah tel dawn
IIM Rohtak, Haryana-a Ek Bharat Shreshtha Bharat North East Yuva Sangam (EBSB North East Yuva Sangam) program-a tel tur National Institute of Technology Mizoram leh Govt Aizawl North College (GANC) zirlai 25 leh zirtirtute 4 te chu Thawhtanni khan Raj Bhavan atangin larsap Hari Babu Kambhampati chuan a vailiam.
Larsap chuan Prime minister Narendra Modi remhriatna leh hmathlir tha tak avangin ram chhunga chengte inpumkhatna atana program tangkai tur EBSB North East Yuva Sangam buatsaih a ni chu lawmawm a tih thu a sawi a. He exchange program hian India hmun dang leh hmarchhak bial mipuite inhriatchianna tha zawk leh inunauna tha zawk a siam dawn tih a sawi a ni.
EBSB kalpui tur hian Ministry of Education chuan ministry leh department hrang hrang – Culture, Tourism, Railways, Information & Broadcasting, Youth Affairs & Sports, Home Affairs, DoNER leh IRCTC a thawhpui a. He program hian India ram hmun hrang hranga chengte inhriatpawhna tha zawk siam a tum a; a bikin hmarchhaka chengte nunphung leh khawsak dan India ram hmun danga chengten an hriatchian lehzualna tura buatsaih a ni. Tourism, traditions, development leh people -to- people connect chungchang sawiho leh inkawhmuh tum a ni.
Zinchhuak turte hi – NIT Mizoram zirlai 18 leh zirtirtu 2; GANC zirlai 7 leh zirtirtu 2 an ni.