Exit Poll a rintlak loh : Mamata Banerjee

West Bengal Chief Minister Mamata Banerjee chuan exit poll sawi lawk te chu a tak nen a inang ngai lo tia sawiin exit poll lak te chu thla hnih kaltaa an ruahman lawksa tawh a ni a ti bawk.
Heng exit poll te hian hlutna a nei lo va, press lamin an pholang pawh a sawisel bawk.
“Kum 2016, 2019 leh 2021 ah te exit poll lak dan kan hmu tawh a. An sawi lawk a dik lo vek” tiin TV9-Bangla a hrilh.
“Heng exit poll te hi mi thenkhat ten thla hnih kalta vela media consumption atana an siam daih tawh a ni a. Hlutna a nei lo” tiin a sawi bawk a.
“BJP tena inthenhranna kalpuia information dik lo thehdarha Muslims ten SC, ST leh OBC quota an laksak dawn an tih avang khan Muslim ten BJP an vote ka ring lo. West Bengal bikah chuan CPI(M) leh Congress ten BJP an tichak zawkin ka hria” tiin a sawi bawk.
Exit Poll lak tam ber te chuan WeBengal ah BJP te chuan TMC te aiin seat an la hnem zawk dawn angin an tarlang a ni.
INDIA bloc chungchangah Mamata Banerjee chuan, “Akhilesh Yadav, Tejashwi Yadav leh MK Stalin leh Uddhav Thakeray te an che tha ang. Khawiah pawh regional party te an che tha ang” a ti bawk a.
West Bengal a CPI(M) leh Congress te nena an inmilloghna chuan Centre ah INDIA bloc sorkar se harsatna a siam ang em tia zawhna chu Banerjee chuan, “CPI(M) an inrawlh a nih ngawt loh chuan all-India level ah harsatna a awm lovang” a ti a.
“Regional party tin hian zahawmna an nei vek a, sawm kan nih chuan kan kal ang a. Regional party dang te pawh kan hruai ang. Inthlan reuslt han chhuak phawt se” tiin a sawi zui bawk.
Hetih lai hian BJP president Sukanta Majumdar chuan an party chuan West Bengal ah seat 25 tal an lak tur thu sawiin seat 30 an lak phak loh chuan an lawm dawn lo a ti thung a.
“Kum hnih kaltaa president nihna ka chelh khan Lok Sabha poll-ah West Bengal-ah seat 25 kan la pel ang ka ti a, khatih lai khan ka party member puite pawhin min rinpui lo. Tunah chuan kan party mai ni lo, press leh he state mipui te hian seat 25 aia tam kan lak an ring tawh a ni,” tiin a sawi.
CPIM central committee member Sujan Chakraborty chuan exit poll chu a rintlak ngai lo a ti bawk a. “TMC laka mipui lungawilohna chuan tun Lok Sabha inthlanah hian dik leh fel taka inthlanna neihna apiangah a tichak lo dawn a ni,” tiin a sawi thung.