FA Cup champion Manchester City

Inrinni zan khan Wembley Stadium-ah FA Cup final khelh a ni a, Manchester City chuan 2-1 a Manchester United hnehin a vawi sarih nan an champion. FA Cup-ah an champion vangin City hian Treble champion an hnaih leh zual a, treble champion ni turin Inter Milan chiah hneh an ngai tawh. An elpui lian City lakah an tlawm vangin United hi FA Cup final-a tlawm ngun ber niin hnuhma chhia an neih belh.
Manchester City leh Manchester United te hi Manchester khaw club pahnih; chungnun inchuh reng renga hmanhlel an nih vangin FA Cup final-a an inhmachhawn tur hian ngaihven a hlawh a. Tualchhung Cup pahnih lak tum United dang tura City in thapui an thawh tur leh City in treble champion nih an tumna tih thlawnsak tuma United in tan an khawh tur chu football ngainatute hmuh chak a ni. Final ngaihven hlawh tak hi hmuhnawm takin a tawp a, champion phu zawk an champion a tih theih bawk awm e.
Khelmual ropui Wembley Stadium-ah Manchester City in beisei phak baka thain bul an tan a, inkhel tan tirhteah goal an thun nghal zawk. City hian ball an thah a, si nghak an pek hnuin si nghak Stefan Ortega chuan na takin ball a pet chhuak a. United defender in Kevin de Bruyne lu an tauh per chu lei a thlen hmain City captain Ilkay Gundogan chuan a hlap goal nghal pawp a, inkhel tan atanga second 12-na lekah hmahruaina goal a thun ngha. Second 12-na lekah Gundogan goal thun hi FA Cup final-a goal lut rang ber niin, record thar a ni nghe nghe.
FA Cup final-a goal lut rang ber chu kum 2009-a Louis Saha thun a ni a. Saha hian Chelsea an hmachhawn tumin Everton tan tan atanga second 25-na lekah hmahruaina goal thunin record thar a siam a. Saha record siam hi Gundogan hian second 13 zeta hma zawkin a rawn khum ta a ni.
Hma takah goal an thun hnuin City an khel tha chhunzawm a, Rodri leh Jack Grealish te goal thun belh theihna hun remchang an neih an chhawr tangkai zo lova, United hnufual lutuk loh phah. Champion tura rinkai zawk City in goal an thun hmasak vangin Pep Guardiola team te hi awlsam takin an champion tura ngaihna lian tak a awm hman. Hma takah goal an chhuah vangin United player te hrilhhai viau mah se an hnual mai lova, an zam hek lo. Huai takin an khingpuite an nawr let a, ball chang tlem zawkah tan mah se City tlarhnung thlamuangin an awmtir bik lo. Goal thun tumin innawr tawn thin mah se muallaiah an indang chat tawn a, hlauhawm an siam tam thei lo ve ve.
Ball chang tlem leh ber zawka tang United in an huaisen rah an seng a, chawlhlawk hmain penalty an hlawhchhuak. Jack Grealish handball vanga penalty an hlawhchhuah chu captain Bruno Fernandes chuan minute 35-naah awlsam taki a pet goal a, an si phurh a sut. Aaron Wan-Bissaka ball tauh vanga Jack Grealish handball hi referee Paul Tierney chuan hmu lovin a ham mai lova, VAR pawh an rawn mai lo. Rin aia tlaiah VAR a rawn a, United in an venneihpui ta a ni.
United in an si phurh an sut hnu lawk hian City in na takin an khingpuite an nawr zui nghal a. Kevin de Bruyne chuan penalty beisei mah se a beisei thlawn a. VAR rawn turin referee Paul Tierney an hmin zo hek lo. Chawlhlawk hmain goal dang a luh belh thei tawh lova, 1-1 a inhnehtawk chungin chawlhlawk an hmang.
Chawlhlawk hnu lamah pawh inkhel a hmuh-nawm chhunzawm zel a, muallaiah an indang tawn dun nasa hle. Inkhel thununtu zawka tan char char City in chu goal thun hmasa zawkah an tang leh ta nge nge. Kevin de Bruyne free-kick fing leh fuh tak chu goal hmahruai thuntu Ilkay Gundogan chuan minute 51-naah vanneihthlak ang reng takin a pet goal a, hma an hruai nawn lehna goal a thun.
Hma an hruai nawn leh hnuin City an khel tha chhunzawm a, an game a nghet tha hle a, goal thun mamawh United in an nawr tlang hleithei lo. City tan hian Gundogan chuan goal thun belh bawk mah se offiside vangin pawm a ni lo thung. United rawlthar Alejandro Garnacho a luh hnuin United an hlauhawm hret a, Argentina rawlthar hian City defender te chhaihbuaiin, an thin phun zawkna tur a siamsak thin. United hian hun pek belh tawp dawn tepah an si phurh an sut teuh hle a. Defender Raphael Varane goal thun ngei tura ngaih chu Luis Diaz chuan vanneihthlak takin a lo block hman hlauh a, City an him hram.
Hun tawp dawn tepah goal chhuah teuh viau mah se City an him tluan a, an hmelma lian ber Manchester City chu 2-1 hnehin FA Cup champion thar an ni ta a ni. FA Cup-ah an champion leh tak vangin City hian treble champion nih an hnaih leh zual sauh. Inrinni zana Champions League final-ah Inter Milan an hneh a nih chuan a vawi khat nan treble champion an ni ang a. Kum 1999-a United in trophy lian pathum an lak hnuah City hi EPL club zinga treble champion leh thei hmasa ber an ni ang.
City hneh lova vanduai Manchester United hi FA Cup-ah vawi 12 champion tawhin, champion ngun ber dawttu an ni a. An chungah vawi 14 champion tawh Arsenal an awm. Vawi 12 champion tawh United hi final-ah vawi kua zet vanduai zawkah an tang tawh a. FA Cup final-a tlawm ngun ber an ni.
Manchester City hi FA Cup-ah vawi sarih an champion na a ni a. FA Cup-a champion tam lamah palina an ni mek a, an chungah hian vawi riat champion tawh; Chelsea, Liverpool leh Tottenham te an awm a. Vawi 12 champion tawh Manchester United leh Vawi 14 champion tawh Arsenal te an awm bawk.
Manchester United lakah goal pawimawh tak pahnih thun a, City champion puitu Ilkay Gundogan khan season tawp rualin City chhuahsan a tum a, La Liga club lian FC Barcelona nen inremna an nei thuak tawh niin tarlan a ni. FA Cup-a champion puitu Gundogan ho City manager Pep Guardiola chuan an hnena cham chhunzawm turin a duh thu a sawi. German midfielder hian City a chhuahsan dawn a nih chuan Inrinni zan champions league final-a Inter Milan an hmachhawn tur hi EPL champion tana a game hnuhnung ber a ni ang.