FA Cup quarter-final lama intum turte
Manchester City chuan an captain hlui Vincent Kompany enkawl Burnley chu FA Cup quarter-final lamah an tum dawn.
City kuta Premier League title pali luhpui tling Belgium defender thin hian football khelh hmanga eizawn a bansan hnuah coaching lam luhchilhin, Championship club Burnley a enkawl season khatnaah Clarets chu table hmahruaitu a nihpui mek a, FA Cup lamah last eight luhpui bawkin, kum 2008 atanga 2019 thleng a khelhna Etihad club ep zawngin khelmual a luhpui dawn nghe nghe.
City legend Kompany enkawl bakah hian division hniam lehzual zawk League Two club Grimsby Town pawhin quarter-final lutin, he cup-a ranking hniam ber team hian Brighton & Hove Albion an luhchilh dawn a; draw dangah Manchester United chuan Premier League club ve bawk Fulham mikhualin, Sheffield United mualah Championship lama an elpui lian ni mek Blackburn an lut thung dawn a ni.
Nilaini zan khan Blades hian Premier League table-a palina luah mek Tottenham Hotspur barakhaihin FA Cup last eight an lut a; Blackburn pawhin fifth-round fixture pakhatah rin loh takin Leicester City an hneh ve bawk.
Grimsby chuan 2-1-a mualneitu leh Premier League bottom club ni bawk Sou-thampton hneh chungin kum 1939 hnu lama a vawikhatna’n FA Cup quarter-final an lut.
Last-eight match-te hi March 17 to 19 chhunga khelh tur a ni.
FA Cup quarter-final draw:
Manchester City v Burnley
Manchester United v Fulham
Brighton & Hove Albion v Grimsby Town
Sheffield United v Blackburn Rovers