Faina lama hmalakna hawng

Faina lama hmalakna, September 15 atanga October 2 thleng hman tur Swachhata Hi Seva (Cleanliness is Service) chu Thawhlehni khan deputy chief minister Tawnluia’n Aizawlah a hawng.
ODF (pawnlera inthiar awmlohna) lama a department enkawl UD&PA leh PHE hnathawh chu lawmawm a tih thu deputy chief minister hian sawiin, subject pakhat – faina leh thianghlimna chu inngheng reng an nih angin, thawhhona tha nei chhunzawm zel turin a chah. Mizoram state pum ODF kan nih theih nana tha leh zung sengtute chungah lawmthu a sawi bawk.
“Khawtlangin bawlhhlawh kan paih dan leh sawngbawl kawngah kan tanrual a pawimawh hle a, mipui rilrua faina leh thianghlimna pawimawh zia bakah naupangte rilru-ah tuh ngheh a nih theih nan awareness campaign kalpui uar lehzual a tul,” a ti.
Swachhata Hi Seva chungchanga hmalakna leh hriat tur inhrilh a ni a. SHS & ISL (Swachhata Hi Seva & Indian Swachhata League 2.0) volunteers leh Safaimitras (thianfaitute) chawimawi an ni. Govt. Hrangbana College, Govt. Aizawl College, Govt. Johnson College, Mission Veng Youth Adventure Club, Pachhunga University College leh Govt. Zirtiri Residential Science College zirlaiten September 15 leh 16 a cleanliness drive an neih lawmpui nan sumfai leh chawimawina certificate hlan an ni.
PHE department leh Aizawl Municipal Corporation-in faina leh thianghlimna kawnga hma an lakna an sawi a ni.