Fan hmang thei lo thingkung hnuaiah ti

Assam Assembly Speaker Biswajit Daimary-a’n mipuite chu fan an lei zo lo a nih chuan thingkung hnuaiah thu mai r’u a tih chu Opposition Congress ten an sawisel nasa hle.
Assam-a BJP sorkar chu power tariff tisang renga puh an nih avanga sawiselna a chhanletna a ni a.
“Sum in nei lo a nih chuan fan on lo mai rawh u. Thingkung hnuaiah thu mai r’u,” tiin Daimary chuan a sawi a ni.
A hnuah a thusawi chu sawifiahna nei zuiin sorkar chuan company te hnen atangin electricity a lei a, power supplier tena a man an tihsan chuan sorkarin a tihsan ve a ngai a ti bawk a.
Daimary chuan mipuite chu a ni lo zawnga thil kalpui lo tura ngenin power te chu renchem taka hmang turin a ngen zui bawk.
Assam Congress president, Bhupen Kumar Borah chuan Speaker thusawi chu na taka chhang letin Stone Age-ah Assam luhpui leh tumna a ti a.
“Kan pi leh pute kha thlifim dawng turin thingkung hnuaiah an thu ngei thin a, mahse, Congress hnuaiah nipui lum vanglai pawha eng leh fan hnuaia awm theihna hunah hlankai a ni a. BJP te hian Stone Age-ah min letpui an tum em ni?” tiin a sawi.
Borah chuan Chief Minister Himanta Biswa Sarma chu State-in sum harsatna nei leh power tariff sangah pawh a buai laia helicopter chelek rengah puhin a sawisel bawk.
State Congress working president, Kamalakhya Dey Purkayastha chuan Chief Minister policy dik lo chu Assam-in tuna harsatna leh buaina a tawhna chhan a ni, a ti bawk a.
“Sorkar hian Speaker-in power tariff sanga thurawn a pek zel zui hian mipuite chu inflation a san em avangin ni khatah tum khat chauh chaw ei turin thurawn a pe dawn em le?” tiin zawhna a siam bawk.
Assam power Distribution Company Ltd te chuan tun hnaiah power unit khat man a hmaa 30 paise a tih chu 70 paise-ah a tisang a, hei hi power-generating agencies te laka leiba rulh nana a tih a ni. Hei hi All Assam Electricity Consumers’ Association, Opposition party leh pawl hrang hrangte chuan an duh loh thu an sawi.