Fashion khawvela hun ropui Met Gala 2026 an nei ta

Fashion khawvela hun ropui bera an sawi thin chu Met Gala hi a ni, kumin Met Gala pawh an rama May ni 4 zan, keini tana nimin tuk khan New York-a Metropolitan Museum of Art-ah an nei leh ta a, kumin hian an theme chu “Costume Art” tih a ni a, dress code chu “Fashion Is Art” tih a ni bawk. Met Gala event hi kumtin May thla Thawhtanni hmasa berah an nei thin a, Metropolitan Museum of Art puala sumtuakna niin, sawmbik te tan chauha tel theih a ni a, sawmbik te pawhin ticket an lei a ngai a, ticket pakhat dollar 1,00,000 man niin, dawhkan pakhat dollar 3,50,000 man a ni. Ticket te hi mi nawlpui lei theih tura zawrh chhuah a ni lo va, a tlangpui thuin designer ten dawkan hauhin, an dawhkan kil thei turin milarte leh an thiantha te an sawm thin.
Met Gala organiser-ah hian fashion magazine Vogue hotunu Anna Wintour a chair thin a, kumtin co-chair an ruat thin a, kumin co-chair te chu Beyonce, Nicole Kidman, Venus Williams leh sponsors Jeff Bezos leh a kawppui Lauren Sanchez Bezos te an ni. Met Gala hi Metropolitan Museum of Art tana sumtuakna anih angin, nikum khan dollar maktaduai 31 an tuak ngah thei a, kumin hian event tan hma pawhin nikum an khum tawh a, dollar maktaduai 40 chu an tlin der tawh a ni.