Thawhleh zan khan German Bundesliga khelh a ni a, champion lai Bayern Munich chuan mikhual FC Cologne lakah tlawm an pumpelh a, harsa takin point an hlawhchhuak. Inkhel dangah RB Leipzig chuan Schalke 04 chu tualzawlah ngeia sawpin, Bayern nen an inkar an tizim.
Champion lai Bayern Munich hi Allianz Arena-a an mikhual FC Cologne lakah chak tura rinkai zawk an ni a. Awlsam takin point thum an hlawhchhuah theih rin a ni. Mikhual team hian rin phak baka thain bul an tan a, inkhel tan atanga minute lina leka goal thunin, mualneitu an barakhaih chian hle. FC Cologne tan hian Ellyes Skhiri chuan hmahruaina goal a thun.
An si phurh sut ngei tumin tan khawh chiam mahse Bayern Munich in goal an thun thei lawk lo. An mikhual lakah ball chang tam in, hlauhawm siamchhuak tam zawk viau mahse an mualah ngei an tlawm teuh viau thung. Hun rei tak chhung si an phurh hnuin hun pangngai tawpna minute 90-naah Joshua Kimmich chuan Bayern chhanchhuahna goal a thun.
-- Advertisement --
An si phurh an sut hnuin Bayern hian hnehna chan ngei tumin thapui an thawh zui nghal zat a, hun tlemte la awmah goal thun an tum ngawrh hle. Dinhmun derthawng zawkah ding thin mahse, goal chhuah belh lovin FC Cologne hi an invengtluan thei hram a, champion lai lakah point hlu tak an hlawhchhuak.
Hmahruaitu Bayern Munich in tlawm an pumpelh hram lai hian pahnihnaa awm mek RB Leipzig chuan Mimualah table hnuai bera awm Schalke 04 chu Veltins-Arena-ah an hmachhawn a, 6-1 ngawta hnehna changin Bayern nen an inkar an tizim.
RB Leipzig tan hian minute sarihna lekah André Silva chuan hmahruaina goal a thun a. Benjamin Henrichs goal thun hnuin Silva hian minute 44-naah an goal thumna a thun a. Minute 45+2 ah Timo Werner chuan an goal lina a thun zui leh a, si li faia hmahruai chungin chawlhlawk an hmang.
Chawlhlawk hnu lamah mualneitu Schalke 04 in second half ah bul an tan tha a, goal an thun thuai. Minute 56-naah Soichiro Kozuki chuan goal thunin, an si phurh a sut then. Kozuki goal thun vangin beiseina thar nei bawk mahse hun tawp dawn hnaihah an beiseina mei chhem mihin a awm thung.
4-1 a hmahruai tawh TB Leipzig tan hian minute 83-naah Dani Olmo chuan an goal ngana thunin, an hmahruaina a tizau a. Minute 89-naah Yussuf Yurary Poulsen chuan an goal rukna a thun zui leh zat bawk.
German Bundesliga 2022-23 khelh mekah champion lai Bayern Munich chuan khelh 17 atanga point 36 hmuin hma an hruai mek a. An hnuai chiaha awm RB Leipzig chuan khelh 17 atanga point 32 hmuin, Bayern nen an inkarah hian point li a tlazep mek a. Champion tumin an inum fal zui zel.