FCAA 2023 HI ‘DAN SAKEI’ a ni a; ADC-te TAN chuan ‘DAN SAKEIBAKNEI KOHAM’ : Part-1

Ruatfela Nu

FCA 1980 kha Forest humhalh nana siam and ni a. FCAA 2023 hi Forest thiah nana siam a ni: Ni. 26. September 2025-a Central Young Lai Association (CYLA) hruaitu te’n Press Conference nei a; ADC tei tet tumna leh ZPM sawrkarin FCAA 2023 a Adopt an dodal thu an puan kha awmhmunah ka lo lawm ve em em a. A chhan chu FCAA 2023 hi Mizorm tana Dan sakei a ni a, ADC pathuamte tan phei chuan Dan sakeibaknei koham a ni dawn a. Chu chu CYLA-in an rawn hre fuh chat kha lawm lo rual em kan nih.
Tribal nun leh Forest hi thil inzawm tlat a ni a. Mizo hi Tribal kan ni a. India ram state hrang hranga kan Tribal puite’n deforestation vanga an tuar nasatzia kan hria. FCAA 2023 hi Forest thiahna atana siam a ni tih kan hre chiang bawk a. FCA 1980, Forest humhalhna Dan tha elhkhen chu, Tribal hnam nek ral raih pawiti lo, BJP chuan 2023 March thlaah siamthatna tur Bill, Parliament-a an put luh atang khan, India ram puma environment renchem leh humhalh kalpuitute leh mi thiam rualin vawiin thlengin kan do a nih hi. Kan hneh dawn emaw, dawn lo emaw Tribal leh kan nunkhawchhuahna ramngaw thiahna Dan sakei hi kan thawk tek tek chhung chuan kan do zel dawn a ni.
Tribal hnam aiin oil palm an duh zawk fe tih hi LADC hian hre mawlh teh se:
Godanijali tih hi oil palm a inti hausa, a chin nana fin fervek chhuaha Tribal ram neihsak mek, Godrej, Adani leh Patanjali te ka hmerkhawmna a ni. Godanijali hian keini Tribal mihringte aiin, an hausak belhchhah zel nan kan ram tha taka oil palm chin an duh zawk fe a. Tribal hnamte hi ral vek mah ila pawi an ti lo. India rama kan Tribal puite an nekchep tawh leh nekchep mek dan kan en hian, Mizoram leh a chhunga cheng hnamte hi min hmangaih bikna tur a awm lo tih hi kan hriat a ngai takzet! Kan chenna ram leilung, a chung leh hnuai hausakna leh ramngaw /ramhmul hausakna hi an duh ber chu a ni. Tun hnaia India ram state hrang hranga Tribal-te chenna an laksak nasat vanga kan Tribal-puite manganzia ngaihtuah ngun a, kan lo inven theihna kan dap hmuh a ngai. Krstian Tribal kan nih avangin anni aiin min dimdawi lo daih zawk dawn tih pawh hriat tur a ni. Assam state-a kan Tribal pui, Adivasi te chenna ram zau tak, Adani cement siamna tura an laksak pawh Assam high court judge te’n mak an ti hle a nih kha. |halai lehkhathiam te u, thil thleng mek hi thlir liam mai mai loin ngaihtuah rawh u. Nangmahni leh in tu leh fa, thangthar chhuan lo la awm zel turte tan a ni.
CYLA hruaitute’n FCAA 2023 an dodal vangin Laifa thangthar chhuan lo la awm turte’n an la fak ang a, an dem bawk ang. An demna tur chu Mizoram sawrkarin oil palm chin nana Liapha, Lawngtlai district-a ram tha lai ber, Patanjali Foods Ltd. MOU a sign pui an dodal loh vangin. Mahse an la tlai lo. Liapha ram Patanjali Foods Ltd-in oil palm an chin vangin, Laifa lo neitu chhungkua dinchhuahpui an awm dawn leh dawn lo chhut ula, kum 15 vel daih vai company-in oil palm an chin vanga Lai ram, ramngaw leh nungcha a tihchhiat nen a inhen leh hen loh chhut bawk ula, Lawngtlai district hnufual takin a din chhuahpui dawn loh chuan hnawt chhuak vek rawh u. In ram a lawm, Ni lawm ni?
Mizoramah oil palm ching suat duh an tam a, suat a harsa si:
Oil palm hi Mizoramin a tha lo tih kan hriat hmain, khawvel chuan a lo hre tawh a. Indonesia velah an ching thar duh tawh lo a, a awmsa pawh an suat mek a, ram dang (foreign country) ah an ching duh tawh si lo a, Godanijali hausakna hnar a ni lak lawh si a. India ram lailia state ten an duh lo bawk a, NE state rawn bum an tum a, Mizoram lo chu bum theih an nei bar lo. India rama CM leh thachhang dawltu an that (an ram an hmangaih bik) vanga state hmasawn chak ber zinga mi, an khua leh tui te duh dan ngaihpawimawhna chang hria, “sawrkar laipuiin ruahmanna thar siam mah se, tunah leh nakinah pawh Uraniuam laih chhuah kan remti ngai lo ang” ti ngam ngat Meghalaya phei chuan oil palm chin hi an duh lo bur!
Kum eng emaw zat kal taah khan, Mizo mi thiam rualin oil palm that lohzia article intawm an ziak darhzau tak a awm tawh a. Assam-a inbun, North Eastern Social Research Centre (NESRC) ten an zirchianna Vanglainiah an rawn tichhuak tawh bawk a. NESCR leh CESJ ten, Mizorama oil palm chin him lohzia zirhona (seminar) kan nei tawh bawk. Tin, Mizoramah mi thiam (zirna in sang zirtirtu) te zirchianna rintlak tak tak a tam tawh bawk. Oil palm hi mi hausa tlemte hlawkna a ni. Chuti chunga kan ram lo neihna tur hmun tha lai apianga an chintir zel chhan chu, politician leh bureaucrats te hi project pawisa fun an it tih an hria a, bum nuam a ti viau pawh ni fahmiang. Hindu puithiam, bawng zun pawh covid hripui damdawi tia mi tam tak bumtu, Supreme Court pawhin a khak tawh, Baba Ramdev-a company, Patanjali Foods Ltd. pawh an lo welcome hurh mai a ni. Patanjali company angte hi chu India rama a performance en hian, Mizorama an rawn luh lohna tura theihtawp chhuah tur a nih tehlul vei nen a. Kohhrante pawh hian ngaihtuah nawn ve teh se.
BDAA 2023-kan ramhmul rawkna tur:
Mizo mipuiin kan ngaihven vak loh, pawimawh em em bawk si chu, Parliament-in FCAA 2023 a passed rual khan, Biological Diversity (Amendment) Bill, 2023, Biological Diversity Act of 2002 siam danglamna a passed tel a. Kan ngaihtuah ngun tur chu, India hian ramhmul damdawi (ayurveda) atangin foreign sum a la lut nasa hle a, he a sum lakluh (investment) a pun theih nan hian, NE state an rawn hmu tai leh hle a ni. Mizorama ramhmul hausakna tamziate hi keini aiin an hre daih zawk a. Kan ramhmul hausakna hausakzia an hriatin an awt/it ngawih ngawih a, duhtawka an lak theih nan, FCAA rualin BDAA an passed ve nghal a ni.
CM Pu Duhoman nge chiang lo keini?:
Hmannia CM Lawngtlai a zin tuma Lawngtlai dist ZPM thuchhuah, (PR.NO.ZPM/04/Lai DHQ/2025/24) kha ka lo chhiar ve a. CM Pu Lalduhoma hian IFA than chhoh dan a chiang lo deuh hlek niin ka hria. Nge PR siamtute zawk an chiang lo? Eng pawh ni se, a tawi thei ang berin, Indian Forest Act, 1876 kha a hmasa ber a, a dawtah Indian Forest Act, 1927 a ni leh. IFA te hian ramngaw a hum zawh loh em avangin, Forest Conservation Act, 1980 siam a ni leh ta a ni. FCA 1980 chuan state list atangin “without approval of central govt” chuan a theih loh a ti fai deuh vek ta a ni. (He lam hi chu a thiam miin an ziakin an sawi tam tawh)
CM Pu Duhoman a hlauhawm loh a tih FCAA 2023 kha rules leh guidelines peih a nih chiah khan, Indian Forest Service (IFS) retired rualin ‘Top Court’ ah an khing a. CM Pu Duhoman Lawngtlaia a thusawiah:- “FCAA hi a hlauhawm lo, mi tute emaw a hlauhawm tia sawitute hian he dan an hriatchian loh vang mai mai a ni” a tih zingah IFS rual, India Forest tan FCAA 2023 a hlauhawm tia SC a khingtute a hmer tel ve ang em?!?
CM Pu Duhoma hi mi inzir peih leh chhiar zau tak ni mah sela, IPS atanga politics-a lut nghal tan chuan, India Forest Service (IFS) direct leh promotee, kum tam tak leh retired thlenga office-a thawk te, university degree nei tura kum 4/5 a forestry leh a kaihhnawih zirbing te, environmental law hrim hrim zirchhuak te, India rama environment kaihhnawih Institution lianpui puia faculty leh scientist te, India ram pum huapa environmentalist leh environment journalism lam luhchilh te, keini, “tui kan nunna hnar, tui tel loin ni 4 bak kan dam theih loh vangin, tuihna siamtu ramngaw leh nungcha humhalh rawh” tia dang thler dawn dawna au tute mai mai pawh telin, Forest humhalhna dan tha ber kan tih chu 1980 kuma siam kha a ni a. Vawiin thleng hian Forest humhalh nan kan la duh ber hi, CM Pu Duhoma chuan development a duh vangin tha ber kan tih chu hnawk a ti a. FCAA 2023 hi BJP rualin Forest thiah nan a duh leh lawi si a ni.
India rama mi thiam, ‘mihringte hi environment tel loin kan damkhawchhuak thei lo’ tih hre chiangtu, ‘Development & Timber Mafia’ te laka Forest humhalhna khauh leh fet tak awmsa FCA 1980 siam that a nih duhtute leh siam that an duh chhan kan hre chiang a. Thu inchuh vak vak tur pawh a awm lo. FCA 1980 kha Forest humhalh nana siam a ni a. FCAA 2023 hi Forest thiah nana siam a ni tih hian kan inhnialna hi a khaikhawm vek. CM pawh hian, “Environment aiin Development ka duh zawk a. 2023-a ka ngaihdan kha 2025 ah hian ka thlak ta thut a ni” tih mai rawh se.
CM-in FCAA 2023 hlauhawm lohzia a sawi a. Keini’n a hlauhawmzia kan sawi hi, Mizoram mipui hian rilru fim taka ngaihtuahin bukna/patla khai se ka duh khawp mai. Keini’n FCAA 2023 hlauhawmna kan sawi thin leh CM sawi hi a in opposite chiah. CM Pu Duhoma duh ang chuan, hmasawnna hming chawia ramngaw thiah dur dur a ni a. Chutiang a thlen chuan kan ram zimte, rawmngaw tlahniam chak em em hi thlaler vaivutah a chang em loh pawhin tui hna zawng zawng a kangchat ang a. Tlanga vur khang, nipuia lui anga luang kan nei ve si lo. Mizoram tui hna hi van ruah tui, ramgaw thing, hnahthel ro leh a zungin a lo thuhruk, lui pui leh lui tea a pek chhuah leh ringa nung tawk tawk kan ni a. Kan nunna hnar kan lui humhimtu chu hnim hring atanga ramngaw a ni. Hnim hring leh ramngaw a chereu chak lutuk avangin kan luite hna neia kangchat zo tawh a, kan luipuiin fintu a nei tawh lo a, kan hmabak chu sik leh sa raltlan (climate refugee) a ni.
Environment tel loa mihringte kan damkhawchhuah theih loh avangin, Dan siamtute khan ‘development aiin environment an dah pawimawh’ a. Dan hmanga Forest humhim chu an thupui ber a ni. FCA 1980 chuan Compensatory Afforestation (CA) hnuaiah hian an thing kih ang hu an phun tur leh ngaw an tihchhiat ang hmun danga an siam lehna tur pawisa, sawrkara an chhun luh dan tur kaihhruaina mumal tak a awm a. Net Present Value (NPV), ramngaw an thiah hlutna an chawi zat tur a awm bawk a. Chung chu ‘Development Mafia’ ten an duh lo. Profit chhiat an an ngaihtuah a. Forest Clearance lak buai ai chuan thiah hem hem an duh zawk a. FCA 1980 khauh leh fir tak, kan chhuan em em chu an duh danin an siam tha (amend) ta a ni. (Part-1ah hian a leng lo. Part-2 rawn ziah chhunzawm leh thuai ka tum ang)