FCRA-ah Special Session koh an phut Black Day hmang lo ila hma la loang – MPCC

Foreign Contribution (Regulation) Act siamthat tumna Bill duhlohnaah Mizoram sawrkar chu Assembly Special Session koa resolution pass ngei turin an phut tih Congress party chuan an sawi a. Hemi chungchangah Black Day hmang lo ta se, ZPM sawrkarin hma an lak an ring lo tih an sawi.
MPCC thupuangtu Lalbiakzama chuan, Kristiante tinzawn ni ngeia langa BJP kaihhruai sawrkarin tun Parliament Monsoon Session-a FCRA Amendment Bill pass an tum duh lohna lantirin July 21 khan Mizoramah ‘Black Day/ Protest Day’ an hmang tih a sawi a. Hei hian Mizo mipui leh kohhran a kai harh ta deuh nia an hriat avanga lawmawm an tih bakah state sawrkar pawh a thangharh ve ta deuh nge, chief minister-in kohhran hruaitute a sawipui nia an hria chu lawmawm a tih thu a sawi.
Black Day an hman nia sawrkara an thil phut pathum zingah, Mizoram sawrkarin State Assembly Special Session koa he Amendment Bill an duh loh zia pass ngei tura an duhna chu tih hlawhtlin ala ni loa; Mizoram kohhran, political party leh NGO hruaitute chief minister ho ngeiin Delhi-ah sawrkar laipui hotute hmu in, he amendment an duh loh thu hi thlen nise, tih pawh tih hlawhtlin tumna a la awm lo tih a sawi.
“Kan MP pahnih hian he Bill sawiho a nih hunah Mizo mipuiin kan duh loh leh tha kan tih loh thu auchhuahpui ngei se, ban phar hunah pawh a duh lo lama phar ngei turin kan phut a ni,” Lalbiakzama hian a ti a. Kohhran hruaitute hmatheha hmang mai loa, hma hruaia heng an thil phut tihlawhtling tur hian sawrkar leh CM an ngen nawn tih a sawi a ni.
BJP hruaitu zinga langsar tak, Uttar Pradesh chief minister Yogi Adityanath-a’n hmarchhaka helna tam chhan chu Kristian missionary-te vang nia a sawi thu sawichhawngin, FCRA atanga Kristian-ten tanpuina an dawn chu Kristian-a inlet tura inthlem leh tih luihna (forced conversion and inducement) atan an hmang nia a sawi vanga he amendment hi irhchhuak a nih a rinhleh awm loh tih a sawi.
Tun Parliament Session-ah tho hian Vande Mataram national song humhimna tur Bill sawihoin pass tum a ni dawn tih MPCC thupuangtu hian sawi bawkin, “He hla hi tunhma pawhin sak thin ni mah se, Mahatma Gandhi leh Congress hruaitute khan Hindu pathiannute chawimawina chang chu telh loh nise an lo ti a. Tunah chuan Vande Mataram hi an pathiannute chawimawina nen national anthem hmaa sak tur a ni dawn a, sak lai hian a thei chuan zawma din vek tur tih thupek a awm dawn a, thupek awih lo hremna tur pawh siam a ni dawn. Tunah pawh sawrkar official function-ah chuan an sak tir fo a, mahse kan Naga unaute chuan sak chu sawi loh din pawh an ding duh lo ngam a ni,” a ti.