February 12-ah LC leh VC inthlanpui Court a inrawlh loh chuan titlang ang

Mizoram State Election Commission chuan autonomous district council pathum huamchhung tih loh, Mizoram district dang zawngah 2025 February 12 hian local council leh village council inthlanpui neih a ni dawn tih a puang a. Tum danga tih loh dan deuhin, vote hi inthlan ni, zan dar 7.00 atanga chhiar tan a ni ang. VC term pawh tawi avanga Gauhai High Court-a kal awm mah se, Court hian inthlang rih lo tura a ti a nih ngawt chuan Commission chuan a inruahman dan angin a kal mai dawn tih sawi a ni.State election commissioner Dr H Lalthlangliana chuan Ningani khan LC leh VC inthlanpui vawi 21-na neih hun tur a puang a. Inthlan puan ni atang hian model code of conduct hman nghal a ni tih a sawi. January 23 thleng chuh tum tan nomination thehluh theih a ni anga, inhnukdawk leh duh tan January 27 chawhnu dar 3.00 thleng hun hawn a ni. February 12 zing dar 7.00 atanga tlai dar 4.00 thleng vote thlak theih a ni anga, tum danga vote thlak zawh ruala vote tla chhiar nghal loin, hemi zan dar 7.00 atanga chhiar tan a ni ang.
Zan dar 7.00 ah hian engemaw avanga vote thlak zawh hman lohna a awm a nih chuan, vote an thlak zawh veleh vote an chhiar zui ve mai dawn tih commissioner hian a sawi a ni.
Inthlana tlingte hian February 14 ralhma in executive body an din hman tur a ni a. Enge maw avanga sawrkarna din mai theih a nih loh chuan, chumi chu chinfel a nih hma chuan charge an la rih lo mai dawn tih a sawi bawk.
Zawhna chhangin state election commissioner chuan, local council leh village council term tihtawp emaw pawhsei emaw chu state sawrkar thuneihna a ni a. SEC chuan term tawp hmaa inthlan leh a kaihhnawih buatsaih fel kha a hna a ni thung a; tunah sawrkarin February 19-a LC/VC term tawp tura a tih avangin chumi hmaa inchingfel tur chuan an ni chuan inthlan hi an huaihawt mai dawn a. Inthlan buatsaih hun turah hian sawrkar lam atanga nawrna a awm loa, an duh ang takin an kalpui tih a sawi a ni.
VC term pawh tawi chungchanga Gauhati High Court-a kal an awm thu chu SEC-in a hria a, court hian inthlang rih lo tura a ti a nih loh chuan, an inruahman dan ang hian an ni chu an kal mai dawn a ni tih a sawi bawk.
SEC chhinchhiah danin, tuna inthlang tur district 9-ah hian VC 544 awmin, seat 2416 a awm a, general seat 1803 leh reserved (hmeichhia) seat 613 a ni. Aizawl Municipal hnuaiah inthlanpui hmasa berah local council 82 a awm a, 2015 inthlanpuiah LC pakhat siam belh niin 83 a awm a. 2020 inthlanpui hnu ah LC thar pahnih siam belh lehin 85 a awm. Kumin January-a LC thar pahnih pian belh lehin tunah hian LC 87 a awm ta a ni.
Aizawl Municipal leh Lunglei Municipal-ah hian LC 111 awmin, seat 723 a awm a, general seat 528 leh reserved seat 195 a ni.
Village council-a vote awm dan:
District VC zat In zat Mipa Hmeichhia Total Seat
Aizawl 70 18375 30860 32788 63648 326
Lunglei 88 14137 26596 25135 51731 344
Serchhip 56 14762 24400 26043 50443 254
Champhai 62 17206 26885 28558 55443 290
Mamit 92 20158 32161 31449 63610 408
Kolasib 60 18360 30417 32928 63345 302
Saitual 46 10743 19894 20387 40281 198
Khawzawl 38 8418 13802 13946 27748 160
Hnahthial 32 5908 11377 11783 23160 134
Total 544 128067 216392 223017 439409 2416