Federer record tluktu Djokovic

Wimbledon 2023 khelh mekah thawhleh zan khan quarter-final khelh tan a ni a. Vawi li champion zawn tawh Novak Djokovic chuan Andrey Rublev lakah set a hloh hmasak zet hnuin hnehna a chang let a, semi-final a lut. Thawhleh zan quarter-final-a a chak khan Nole hian Grand Slam semi-final vawi 46 a lut tling chiah a. Grand Slam semi-final lut ngun ber record lo siamtu Roger Federer record a nih rual. Djokovic hian semi-final-ah Jannik Sinner a hmachhawn zui leh dawn a, Zirtawp zanah final luh inchuhin an inkhel ang. Grand Slam-ah vawi 23 champion tawh a, mipa lamah champion ngun ber ni mek Djokovic hi Wimbledon-ah a champion nawn leh a ni chuan he inelnaa champion ngun ber Roger Federer record a nihrual bakah Grand Slam-a champion ngun ber Margaret Court-i record a nih rual bawk ang.
Centre Court a chak than Novak Djokovic hian Russian star Andrey Rublev lakah bul a tan tha lova, set hloh hmasa zawkah a tang. Nole hian set khatnaah break theihna hun remchang nei hmasa mah se a a chhawr tangkai zo lova, a serve hum zo lo hmasaah a tang zui ta zawk. Khelh hun tur an ruahman fuh loh leh ruahsurin a tihbuai thin vangin Djokovic hian Wimbledon 2023 ah awl ni a la nei mang lova, ni thum ngawt a zawna a khelh a ngai. A khel zawn zing hi a tuar tih a hriat a, a service na hleithei lo. Rublev hian break a neih chhawr tangkaiin set khatna a la.
Set khatna a hloh hnuin Djokovic-a’n a zia a chhuah a, set hnihnaah a khel tha leh ta viau. Set hnihnaah hian break a nei zawn a, game khat chiah a hloh a, awlsam takin set a la. Set khat ve ve an lak hnuin Djokovic-a’n inrintawkna sang zawk a nei thar leh a, a khel tha leh viau tawh. Set thumnaah break a nei leh thuai a, set la nawn turin dinhmun tha takah a ding. Dinhmun chhe zawkah ding mah se huaisen takin Rublev a inlan a, awlsam takin Djokovic chaktir a tum bik lo. Djokovic-a’n set lak tur rei tak a dang a, break theihna hun remchang a neih a chhawr tangkai zawh thin loh vangin uiawm takin Rublev-an set a hloh nawn leh.
Set hnih la zawn tawh Djokovic-a’n ngam takin a khingpui a nawr a, set linaah break a nei zui leh. Seni-final luh ngei tumin Rublev-a’n tan khawh mah se Djokovic a dang zo lova, Australian Open quarter-final-a a ngam loh Djokovic bawk a ngam lo nawn leh a, semi final lut zo lovin a tla. Inkhel hmuhnawm takah Djokovic hian 4-6, 6-1, 6-4, 6-3 a hnehna changin semi-final a lut a. Ropui leh zual turin vawi hnih chak chiah a mamawh tawh.
Thawhleh zana inkhel dangah Italian Jannik Sinner chuan set khat hloh chungin Roman Safiullin a hneh a, a vawi khat nan Grand Slam semi-final a lut. Semi-final-ah Wimbledon 2022 quarter-final-a a hneh loh Djokovic a hmachhawn zui leh dawn a, final lut turin fiahna hautak a paltlang a ngai dawn.
Kum 21 mi Sinner hian Safiullin lakah bul a tan tha a, set khatnaah break a neih a chhawr tangkai a, set la hmasa zawkah a tang. Set khatna a lak hnuin set hnihnaah a bul a tan fuh lo viau a, a serve a hum zo lo nghal. A serve a hum zawh loh vangin game thum bak a la thei lova, set a hloh ve thung. Set khat ve ve an lak hnuin Sinner a khel tha ta viau thung a,. set thumna leh set linaah harsatna lian a tawk zui lova, 6-4 3-6 6-2 6-2 a chakin, semi-final a lut.
Semi-final a intum tur Jannik Sinner leh Novak Djokovic te hi Wimbledon 2022 quarter-final-ah an lo inhmachhawn tawh a. Sinner hian set hnih la hmasa in, chak theihna hun tha tak a neih a chhawr tangkai zo lova, Djokovic er let tuar lovin tlawm zawkah a tang. Kum 2022-a a hneh loh Djokovic lakah tha zawka inlan in, a vawikhat nan hneh ngei a tum thu a sawi a. A khingpui tur hi kum 2013 hnu lamah Centre Court-a la tlawm lo leh Wimbledon-a vawi 33 zet chak zawn tawh a nih vangin chak a harsat tur thu Sinner hian a sawi tel bawk.
Djokovic leh Sinner te hi vawi hnih an inhma-chhawn tawh a. Tennis player ropui bera ngaih Djokovic a la chak vek rih. Zirtawp zan hian a vawi khat nan Sinner-a’n Nole hneh a tum ang.