Tottenham in Kane chelh an tum

English Premier League club lian Tottenham Hotspurs chuan an player pawimawh Harry Kane chu kawl chhunzawm ngei an duh a. An hnenah a cham chhun zawm a nih chuan Kane hi kar khatah £400,000 zet hlawh pek an huam.
Tottenham leh England tana goal thun hnem ber Harry Kane hian trophy lian lak a duh vangin Tottenham chhuahsan a duh a. Lak tuma heltu Bayern Munich zawm a duh. German champion Bayern Munich pawhin Kane hi lak an duh viau a, lak tumin vawi hnih an dawr tawh. Tottenham nen man leh mualah inremna nei thei rih lo mah se Bayern hian dawr nawn leh ngei an tum. Bayern Munich hi champions league khel tur leh trophy lak theihna hnai vai a nih vangin Kane hian pan a duh ve bawk.
Forward thar mamawh Manchester United chuan goal thun thei tak Harry Kane hi an tlarhma thuam chak turin lak an duh viau. Lak tumin hel thin mah se Tottenham hian Premier Le-ague-a an elpui lian club te hnen ah kher chuan an goal thun khawl hi hralh an tum lo bur thung. An hralh dawn rau rauh a nih pawhin Kane hi ram dang club hnenah hralh an duh. Ram dang club hnena hralh hram an duh vangin Bayern Munich tan lak theihna kawngka zau zawkin a inhawng.
Bayern Munich in lak tuma an dawr laiin Tottenham chuan Kane hi chelh hram dan kawng an dap ve ngar ngar thung. An hnenah a cham chhunzawm dawn a nih chuan EPL- player hlawh hnem pathum zinga tel turin kar khatah £400,000 hlawhtir hial an huam. Tottenham manager thar Ange Postecoglou chuan Kane chelh tumin thapui a thawh dawn a. He thu buatsaih lai thleng hi chuan Ange Postecoglou leh Kane te hi an la inhmu lo thung.