Feet 469 a sang atanga Tennis ball tihtlak a dawng

Hmun sang tak atanga thil tla lo dawn chat hi thil harsa tak mai a ni a, finkhur pawh a ngai khawp mai. Rawlthar pakhat chuan feet 469.5 a sang atanga Tennis ball an vawrh chu leia dingin a lo dawng chat a, tennis ball tla dawng zinga ball tlakna sang ber record a siam.
A hming chu Cemron Heinig a ni a, rawlthar kum 18 mi a ni, record siam tur hian a inbuatsaihna a rei tawh a, a thianpa Julian nen an inzir zak zak a. Julian hi drone khalh thiam niin, a drone-ah tennis ball dahin, sang taka a thlawh tir a, drone atang chuan tennis ball chu an titla ta a, chu chu lo dawn chat theih kha an inzir ta a ni.
Heinig chuan a tirah chuan sang tak atanga ball rawn tla chu a dawng thelh nasa hle niin a sawi a, baseball glove hmangin kum hnih chhung vel zet chu a khat tawkin hmun sang tak atanga ball tla dawn chu a inzir thin a ni. Glove bun chunga a tih fuh hleihtheih tak loh hnuah kutlawngin a inzir leh ta a ni.
Heinig hian record siam a tum niah chuan a ball-ah chuan reflector an bel ta a, reflector an bel loh chuan sang tak atanga ball lo tla chu hmuh mai a harsa thin a, Heinig pawhin vawi thum a tih nawn naah record hi a siam thei ta chauh a ni.