Ferrari lama insawn tum Hamilton

Ningani khan media report hrang hrangah tum sarih ngawt Formula One world champion ni tawh Lewis Hamilton-a’n nakkuma Mercedes chhuahsan a tum thu leh Ferrari zawm a tum thu an tarlang hlawm a, Italian team-ah hian Spanish driver Carlos Sainz a thlak dawn a ni.
Sky Sports television chuan Mer-cedes principal Toto Wolff pawh an driver ropui chhuah tur thu nemnghet tur hian a inbuatsaih niin an puang.
Kum 39 mi Hamilton hian kum 2013 atang khan Mercedes team tan inelna a la hmachhawn ngar ngar a; a F1 title hmasaber erawh kum 2008 khan McLaren behchhan chungin a sualchhuak thung a; nikum nipui thawt lai khan kum hnih daih turin contract thar a ziak a, ti hian, tuna a Mercedes contract neih mek hi kum 2025 tawp ruala zo ve tawh tur a ni.
Briton mihang driver Hamilton hian a career-ah grand prix hnehna vawi 103 a chang tawh a, 2024 season-ah hian British team tan intihsiak a hmachhawn leh zet ang a, nakkum atang chuan Mercedes hmelma lian Ferrari-ah kum rei zawk daih tur inremna a ziak dawn tih media lama tarlan a ni.
Italian team-a Hamilton insawn tur hi Formula 1 chanchina driver transfer lian ber a nih loh pawhin a lian ber zinga mi chu a ni ngei dawn a; Ferrari-ah hian Charles Leclerc nen inkawp tura ngaih an ni.
Tarlan tak angin, kum 2013-a Mc-Laren chuahsana Mercedes a zawm hnuah Hamilton hian championship title pasarih a lak tawh zinga paruk a hlawhchhuak a, Silver Arrows car khalh chung hian race hnehna tum 103 a chan tawh zinga 82 a hlawhchhuak.