Film, music video leh audio lei theihna tur ‘Thulkhung’ app CM-in a tlangzarh
Film, music video leh audio lei theihna tur ‘Thulkhung’ app CM-in a tlangzarh
Man chawi a Mizo film en theihna app hi chu a awm nual tawh a, tunah chuan film chauh ni loin, music video leh audio ringawt pawh lei theiha dahna ‘Thulkhung’ app chu nizan hmasa khan Mizoram Chief Minister Zoramthanga’n a tlangzarh ta. ‘Thulkung’ app hi Music Domain Mizoram (MDM) te buaipui a nih rualin he app a film, music video leh audio hralh tura dah duh tan MDM member nih kher a ngai lo va, mi tupawh, a duh apiangin an hmang thei dawn a ni.
‘Thulkhung’ app tlangzarhtu CM chuan he app thar hi zai mite chauh ni lo, zo hnahthlak tawh phawt tan a hlu hle dawn niin a sawi a, mipuite pawhin zai mite duhsak a, a thlawn ringawta an hlate neih tum lo va, zaimi te an din khawchhuahna tur platform tha tak lo awm thar hi hmang tangkai a, zaithiam kan tihte tana luang chhuak ve turin Mizo mipui a sawm a, hetiang app tha leh tunlai mil a siam chhuah a ni ta chu lawmawm a tih thu sawiin, Mizoram mipui ten tangkai taka a hlawk nan hmang theuh turin a sawm nghal bawk a ni.
Thulkhung app-ah hian Zaii Hauchhum, David Darlong (Mizo Idol 2022 Top 3), Zorinzuali Khiangte leh Jeny Zathang te pawhin an music video thar te lei theih turin an dah nghal a, heng music video te hi he app ni lo, YouTube leh app dangah hmuh dawn a awm dawn lo. Film thar Black Rose pawh he app-ah hian dah a ni a, hralh pawh a kal nghal hle nghe nghe a ni.
www.thul-khung.com-ah app hi download theih a ni a, mahni phine-ah Thulkhung app player chhawm hmangin duh hun hunah hla te a ngaihthlak theih ang a, video te a en theih a. Zaii hian a hlaphuah ‘Kar hla thin mah se’ tih music video a siam thar chu he app-ah hian a dah nghal a, David Darlong pawhin a hlaphuah ‘Min tiam rawh’ tih music bideo dahin, Zorinzuali Khiangte pawhin ’90’s Hmangaihna’ a dah thar a, Jenny Zathang pawhin ‘Vengtu Angel’ music video a dah thar bawk. Heng music video te hi vawi khat Rs 30 chawiin en leh ngaihthlak reng theih a ni.