Sawrkar laipui Ministry of Corporate Affairs hnuaia Investor Education and Protection Fund Authority (IEPFA) leh Mizoram Tourism Department tawngdun chuan “State Level Conference on Financial Literacy in Amrit Kaal” chu Ningani khan Aizawlah an buatsaih.
He hun hmanpuitu Tourism minister Robert Romawia Royte chuan sum leh pai peipunna lam hawi inzirtirna chu Mizoram mipuiin kan mamawh hle a, ziak leh chhiar thiamah kan state chu India ramah a ti tha ber pawl kan nih laiin, sum leh pai lama hriatna – financial literacy-ah erawh India ramah a hniam ber pawl kan ni, tiin, “Hei hian financial literacy kan mamawhna sanzia a tilang chiang hle,” a ti.
Savings bank-a sum dah ringawt a tawk loh zia sawiin, sum leh pai peipun dan zir kan mamawh bakah thiamna sang zelah kan theih ang tawka inzir zel a, hmasawn kan tum a pawimawh tih a sawi bawk.
Chief secretary Renu Sharma pawhin thu sawiin, zirna leh hriatzauna kawnga tha leh sum hman chu thil dang zawng aiin a hlawk a, hlep a tam ber, tiin a sawi. “Mizoram hi kawng hrang hrangah a che tha hle a, hmarchhak state-te zingah agriculture, horticulture, trade & commerce ah phei chuan a hmahruaitu a ni. Financial literacy lamah erawh hmabak ko tak, kawng thui tak zawh tur kan la nei,” a ti.
Financial literacy lama sang tur chuan sum thawhchhuah ringawt a tawk loh thu leh mithiam bikte kuta dah ngawt chi a nih loh thu sawiin, mipui mimir a te ber atanga a lian ber thlengin sum siam thiam a, khawl thiam leh sum peipun dan kawnga hma kan sawn a tul hle tih a sawi a ni.
He hunah hian “75 Iconic Investor Awareness Programme (IAP) for Mizoram” chu minister hian a hawng a. Mizoram hmun 75-ah financial literacy campaign hi neih chhunzawm tur niin, hei bakah hian hmeichhiate tan bika buatsaih financial literacy campaign “Niveshak Didi” hmalakna a hawng bawk.