Kum 5 chhunga college tuition fee lut cheng nuai 881 chuang

Kum 5 kalta chhung khan sawrkar hnuaia awm college hrang hrang atanga zirlaite tuition fee lut chu cheng nuai 881 chuang a ni.
Assembly Session-ah ZPM member Lalduhoma chuan zirlaite tuition fee atangin sawrkarin chhiah a lak chhan a zawt a. Higher & Technical Education minister Dr R Lalthangliana chuan, chhiah an la loa, tuition fee leh college-a hman tur thildang hran hrang chu lak thin a ni hrim hrim tih a sawi.
Hengte hi sawrkar account-ah a lut a, a hman leh dan chu department-in a hriatpui lo tih sawiin, tuition fee bikah hian zirlai pakhatah Rs.1200 lak a ni tih a sawi.
Zawhna neitu in tunhnaia zirlai pawlin college fee lak hi college tihchangtlunna atan hman let tura an nawrnaah, zirlai pawl leh sawrkar inremna bawhzui a nih dan a zawt tel a. H&TE minister chuan, fee lut zawng zawng hi sawrkarin a duh ang angin a pawngpaw hman ngawt thei loa, India Consitution Article 284 ah inziak angin, college-in direct-in a hmang thei loa, General Financial Rules-a kalphung awmsa anga hman thin a ni tih a sawi. Chumi ni lo, phal chin laiah erawh college tan sum hi ruahmanna an siam tih a sawi a ni.
H&TE minister sawi danin, tuition fee atang hian kum 2018 – 2019 ah nuai 169, 2019- 2020 ah nuai 166, 2020- 2021 ah nuai 163, 2021- 2022 ah nuai 189, 2022- 2023 ah nuai 193 a lut a, a vaiin nuai 881 chuang a ni.