Fire Service Week hmang tan
Kum tina India rama hman thin Fire Service Week chu Fire & Emergency Services Hqrs. ah Zirtawpni khan hman tan a ni a. Aizawl pawn lama Fire Station-te pawhin anmahni hmun theuhah ve bawk.
Kumdanga kalpui thin angin April 14 bik hi Martyrs Day atana hman niin, martar-te sunna hunah hian nikum chhunga India rama kangthelhnaa thi mi pathum sunna hun hman a ni.
Kum 1944 April 14 khan India indo lawng lian ‘Fort Stikine’ an tih chu Mumbai lawng chawlhhmuna a din laiin kangmei a chhuak a, he lawnga ralthuam leh bomb lam chi tam tak a phurh chu a kang a ni. He kangmei chhuak thelhtu Bombay Fire Brigade mi 66 leh Bombay Salvage Corps mi 11 chuan nunna an chan phah a. Heng mite hriatrengna atan hian Fire Service Day hi April 14-ah hman a ni. April 14-20 chhung chu Fire Service Week atan hman zui zel a ni thin a. Week chhung hian India rama Fire Service chi hrang hrangte chuan kangmei laka himna tur zirtirna an pe thin a ni.
Fire Service Week chhung hian school hrang hrangah Fire Safety Awareness Programme hman a ni anga, sawrkar hmun pawimawh bik leh damdawi inte pawh kangmei laka invenna an neih that leh that loh endik a ni ang.
Directorate General – Fire Service, Home Guard & Civil Defence Commendation (bronze) Disc leh certificate chu Lunglei Fire Station staff mi 11 hnenah an hnathawh that avangin Fire service Week-ah hian dawng tura thlan an ni a. Commendation Disc leh certificate hi a taka dawn hunah sem a ni ang.
Kumin Week thupui chu “Kangmei laka fimkhur nachang hriat hi ram hmasawn zelna atan a pawimawh” tih a ni.
Fire Service Week hmang tan
Get real time updates directly on you device, subscribe now.