Sawrkar laka beidawng ngawih ngawih turin an fah – CM

Sawrkar laka beidawng ngawih
ngawih turin an fah – CM
Sawrkar laka beidawng ngawih ngawih turin mipui leh thalaite fah an ni tih chief minister Zoramthanga chuan a sawi.
Zirtawpnia MNF Serchhip East leh West Block Joint Block Conference Serchhipa neih a hmanpuinaah MNF president ni bawk Zoramthanga chuan an lo lungmuan deuh avanga Lungleia an tlakna chu inkaihharhna atan an hmang dawn tih sawiin, “Tho rawh u, kan dingchhuak leh dawn, tia au tur che u in ka lokal a ni. Eptuten kan sawrkar hi a chhe thei ang bera min beiin, Zoram chhe lailet der angin an chhuah a; mipui leh thalaite sawrkar laka beidawng ngawih ngawih turin an fah a. Chuvangin, beihpuiin kan bei ve tawh dawn,” a ti.
Opposition-ten man sawiselna SEDP leh SASCI (Special Assistance to States for Capital Investment) chu Pathianin malsawmna min pek niin Zoramthanga hian a sawi. MNF chuan harsatna tam tak hmachhawn tawh mah se, Pathianin a hruaichhuak lehzel tih a sawi bawk. “Kan hnam movement engmah loa chhuah tumtute an hniam sat sat zel a, thalaite pawhin hmana in phal loh kha a ni a, Pathian pawhin a phal lo. Kan hnam movement champion-na hi kan thalaite hnenah Pathian thlarauin a dah a, vawiin thlengin a alh zel a ni. Party advantage lak duh vanga sawi nep tumtute hi thalaiten kan phal tur a ni lo,” a ti.