Fire Service Week hmang tan
Kum tinin India ram pumah April 14–20 chhungin Fire Service Week hman thin a ni a. April 14 bik hi Fire Service Day/ Martyrs Day atan hman thin a ni. Mizoramah chuan Thawhlehni zing khan Fire & Emergency Services director HL Thangzuala’n Fire Service Week 2026 hi state puma hman turin a hawng.
Fire & Emergency Services director chuan, Fire Service Week tum bulpui ber chu, mipui vantlang leh mimal tin, kan nitin nun, khawsak leh chetvelna tinrengah kangmei tichhuaklo tura inven leh fimkhur nachang kan hriat deuh deuhna tura inzirtir a ni tih a sawi a. Kumin Fire Service Week thupuiah kangmei lakah sikul leh damdawi in a lo him zawknan khawtlang mipui kangmei tichhuak lo tura infuihna hman a ni tih a sawi.
Fire Service Week pual hian damdawi in thlan bikah Fire Safety Audit neih a ni dawn a. School hrang hrangah school naupangte fire & evacuation drill leh lecture & demonstration neihpui an ni dawn a ni.
1944 April 14 khan indo lawng lian ‘SS Fort Stikine’ an tih chu Mumbai lawng chawlhhmun a thleng a. He lawng, ralthuam leh bomb lam chi tam tak phur hi a kang ta vak a. He kangmei chhuak thelh tuma tlanlut Bombay Fire Brigade mi 66 leh Bombay Salvage Corps mi 11 chuan an nunna an chan. Heng thite hriatrengna atan hian Fire Service Day hi April 14 ah hman a ni ta a. He ni denchhen hian April 14-20 chhung hi Fire Service Week atan hman zui a ni bawk.
Week chhung hian India rama Fire Service hrang hrang chuan kangmei laka himna tur an zirtir thin a. Kumin Fire Service Week thupui atan India sawrkar chuan “Safe School, Safe Hospital & Fire Aware Society – Together for Fire Prevention” tih a thlang a ni.8 Kumin Fire Service Week denchhen hian Mizoram atangin F&ES-a thawk mi 5 chu Ministry of Home Affairs Civil Defence & Home Guard-a director general – Fire Service chuan an hnathawh that avangin silver & bronze disc and commendation certificate dawng turin a thlang. Silver Disc – Lalremmawia, Divisional Fire Officer, F&ES, Brone Disc – firefighter pahnih – R Laltanliana, Serchhip Fire Station leh H Lalremruata, Mamit Fire Station; driver grade–II pahnih – Ramsangzela, Mamit Fire Station leh FX Laltanpuia, Serchhip Fire Station
8 Kumin martar-te sunna hunah kum 2025 chhunga kangthelhna leh duty kaihhnawiha thite sun an ni a. Sony S Kumar – Fire & Rescue Officer – Kerela Fire & Rescue Services leh Dunger Singh – Leading Fireman – Uttarakhand Fire & Emergency Services an ni.