Tuichangral Games 2026 nei mek

April 13 – 22 chhunga Khawhaia neih tur Tuichangral Games 2026 chu Thawhtanni zan khan Sports & Youth Services minister Lalnghinglova Hmar chuan a hawng.
Tuichangral Games & Sports Association (TGSA) buatsaih he Games-ah hian football (mipa leh hmeichhia), volleyball (mipa leh hmeichhia) bakah kum 16 hnuailam tan boxing, wrestling leh weightlifting-ah inel a ni dawn a. He Games-in a tum ber chu, India-in 2036 Olympic thleng tura a inbuatsaih mekah Mizoten infiammi, India aiawh tur kan thawh ve ngei theihnan kum 16 hnuailamah nasa taka tan lak a ni.
Minister chuan Tuichangral Games chu GSA leh mipui tangrualin an buatsaih a nih avangin a ngaihlu hle tih a sawi a. Tuichangral mipuiin Games chu lo ngaihlu sauh sauh tur leh, a bikin kum naupang zawk tan Olympic sports discipline-a inelna buatsaih thin chu ngai thutak zel turin a chah.
Sawrkarin Olympic 2036 hmathlir neiin a bulthut atangin sports a kalpui tih a sawi a. “Infiamna thenkhatah India rama langsar pha khawp kan nih avangin sports-a sang ta viauah kan inngai maithei. National Games darthlalangah kan dinhmun dik tak pholanin a awm thin a, India rama infiamna khawmpui lianah a hnuai lamah zel kan awm. Chu chu thlak kan tum a, sports infrastructure leh thildang kan ngaihpawimawh rualin, infiammite theihna tihhmasawn kan ngaipawimawh ber a, a bulthut atangin coaching tha pek kan duh,” a ti.
Empowering Mizoram Sports (EMS) kaltlangin Mizoram sawrkarin infiammite bana kaihna tur a kalpui mek tih a minister hian a sawi a. Infrastructure lam buaipui thulh loin, a pawimawh zawk infiammite chherchhuah chu an tum lian ber a ni thu a sawi.
Sports minister Lalnghinglova Hmar hmalakna-in kum 2025 atangin Tuichangral Games leh Tuipuiral Games-ah naupang zawk tan Olympic sports discipline-ah inelna buatsaih thin a ni a. Kumin Tuichangral Games-ah hian Mizoram State Sports Council, sports association leh Tuichangral GSA tangrualin kum 16 hnuailam tan boxing, weightlifting leh wrestling-ah inelna buatsaih a ni. Inelna buatsaihna atan sawrkar atangin sports association-ah Rs. 1,00,000 theuh leh Tuichangral GSA ah Rs. 50000 pek thin a ni a. GSA-a pek thin hi nakum atang chuan Rs. 1,00,000 ah tihpun a nih tur thu leh, Tuichangral Games buatsaihtute an inhawn chhung chuan EMS sports discipline dangah pawh sawrkarin a puih zel tur thu minister hian a puang a. Tuichangral Games thlengtu Khawhai field tihhmasawnna atan cheng nuai 15 dah a ni tih a puang bawk.
Tuichangral Games hi a tum 15-na a ni a. Kum 1970 khan ‘Tuipui, Tuichangral Mini Olympic’ tiin kalpui tan a ni. Kum 3 chhung kalpui a nih hnuah sum lama harsatna avangin chawlhsan a ni a, kum 1982 khan mi thahnemngaiten Tuichangral Games hming vuahin an din thar leh a ni. Kum 12 chhung kalpui a nih hnuah sum lam harsatna avang bawkin chawlhsan a ni leh a, kum 2005 khan Tuichangral khawchhuak mi thahnemngaite zarah mi 8 sponsor-naa neih chhoh leh a ni. Kum 2014 khan khawchhak lam Tuipuiral nen infinin ‘Tuipui, Tuichangral Games’ tiin khawchhak lam leh khawthlang lam nen inthlen chhawkin kum 3 chhung neih a lo ni tawh a ni.