Firfiaka chete thlawp lo ngam turin duh

Firfiaka chete thlawp lo ngam turin duh
BRICS summit Kazan-a tel mek Prime Minister Narendra Modi chuan hmun hrang hranga pawikhawihna lian tak tak thlen thintu firfiakte chetna thleng leh thin chu na taka sawiselin, firfiakte thawhpui duh tlat ram an la awm thin pawh thil pawi tak a nih thu a sawi.
Summit tum 16-na a inlawmna thu a sawinaah Modi chuan hnam hrang hrangte chu inlungrual taka awm reng tur leh firfiakte hmachhawna, tanpuina petute na taka do zawk turin a ngen.
Indo chu India duh dan a nih ngai loh thu leh, indona ni lovin inbiakna leh inzahtawnna chu India tanhmun a nih reng thu a sawi.
Hemi a sawihma thawhlehni khan Modi leh Putin inkawmin, New Delhi chuan Ukraine nena an buaina chungchangah remna palai hna thawh a inhuam reng thu a lo sawi tawh a, mihring dikna chanvo humhim chu an thil dahsan tak a nih bakah, India chuan a tu ve ve pawh a tul hun apiangah inremna kawnga puih a inhuam reng thu a lo hrilh tawh a ni.