Fishries changtu Union MoS-in sangha khawi lama hmalakna en

Fishries changtu Union MoS-in
sangha khawi lama hmalakna en
Union minister of state for Minority Affairs and Fisheries, Animal Husbandry & Dairying George Kurian chu Inrinni khan Aizawl a lokal a. Pathianni khan New Delhi a pan leh a ni.
Union MoS hi Lengpui Airport-ah Fisheries minister hi Lalthansanga Fisheries department hotu dangten an lo dawngsawng a. Lengpuia mimal sangha dil siam bakah North Eastern Council (NEC) hnuaia Fish Farmers’ Training Centre dinna tur hmun, Laldenga Fisheries Demonstration Farm tlawhin, hmalak tum dan a enpui.
Fisheries department hotute chuan Mizorama sangha dil siamtute harsatna hrang hrang lo thlenin, sangha khawia hmasawnna tura sawrkar laipuia state sawrkarin project a thehluh tawh, Zawlnuam-a Integrated Aqua Park tur telin, pawmsak thuai an nih theihnan hma lakpui turin an ngen.
Union MoS hian sangha dil siamtute sum lama an harsatna sutkianna atan Fish Farmers Producer Organisation (FFPO) hnuaia equity grant a kawhhmuh a. Sangha chaw lakna (fish feed acquisition) chungchanga an harsatna chu, tualchhunga sangha chaw siamchhuah dan ngaihtuah tur leh start-up ang zawng pawha an kalpui theih thu a hrilh.
Sangha dil siamtuten sawrkar hnuaia anmahni tana hamthatna awmte an hriat a ngaipawimawh hle a, outreach programme neihpui turin officer-a lo thawn tur thu a sawi. Sawrkar laipuiin hmarchhak state-te a ngaipawimawh tih a sawi a ni.
Mizoram chuan sangha khawi lamah hmasawn theihna tam tak a nei a, hmalak theihna hmun hectare 24000-ah zaa 26.5 ah kalpui a ni tawh tih Fisheries department hotute hian an lo hrilh a ni.
Aizawl a thlen hnuin George Kurian hian Khatla-ah Ornamental Fish Rearing Unit dinna tura Pradhan Mantri Matsya Samapada Yojana (PMMSY) scheme hnuaia tanpuina dawng tura thlan, sales outlet a tlawh a. PMMSY hi sawrkar laipui Ministry of Fisheries, Animal Husbandry and Dairying hnuaia Department of Fisheries hmalakna a ni a. A tum ber chu, India ramah sangha khawi lama hmasawnna tluantling, khuarei daih neih a, ‘Blue Revolution’ thlen a ni. Sangha dil siam, enkawl, zawrh leh a kaihhnawih thila hmalak ngaihna kalpui a, sangha dil siamtute hamthatna ngaihtuahsak a, tunlai mila her danglam leh tihchangtlun a ni.