Football a lian lian thei lo China

Khawvela mihring tamna ber China chu football-ah an harh thar a, kum 2050-ah chuan football ram ropui nih ngei an tum. China lal Xi Jinping meuh pawhin a phurpui em vangin Chinese Super League pawhin khawvela player tha a hip a, hlawh sang u chuak tak hlawh turin player tha an la lut zut zut. Forward langsar Carlos Tavez meuh pawh an lak luh hman hial vangin football khawvelah vung thar an chhuah hluai a. 2022 a nih meuh chuan China-ah football thawm a reh a, an khelmual ropuite pawh thiah darh a ni ta hial. Football-ah China an pawr zuih. 
China hi chungnung ber nih tum reng renga hmanhlel an ni a, khawvela ropui ber nih tumin an bei nasa viau bawk. Sipai chakna leh ralthuam neih that bakah economics-a chungnung ber nih tumin tan an lakna a rei viau tawh a, US an el phak ti tih der tawh. Ralthuam leh Economics-ah hma an sawn chak em em laiin infiamna, a bikin football-ah an la sang lo viau thung. Football-ah pawh ram ropui nih ngei an tum thar a, kum 2050-ah chuan football ram ropui nih ngei ngei tumin ruahmanna pui tak an siam.
China President Xi Jingping chuan football ram ropui nih tumin ruahmanna lian tak a nei a. A ruahmanna langsar zingah World Cup khel phak te, Fifa ranking-a top 20 ram te inelna huaihawt a, China-a thlen te,  kum 7 chhunga Football school 50,000 zet din leh school naupang 50million zette tan khelmual siam te a tel. 
Football-ah hmasawn tuma an ruahmanna a pui bawk a an tualchhung league sang ber Chinese Super League club te pawhin sum an ngah thar hle. Kum 2016-17 season khan Chinese Super League club ten khawvela player tha an la lut hlawm a, hemi tum hian khawvela tualchhung league zawng zawng zingah bazar nana sum seng hnem ber an ni hial. Khawvela player hriat hlawh Carlos Tevez, Hulk leh Oscar te an la lut rual thawt. Player tha an hip theih nan hlawh sang uchuak tak an pe a. Manchester United leh Manchester City forward hlui Carlos Tevez phei chuan kar khatah £650,000 zet a hlawh. Tevez hian second tinah pound khat zel a hlawh hial. Chelsea leh Brazil player pawimawh ni phak Oscar pawhin a hlawh sang viau a. Ani phei hi chuan holiday hmanga thang bo a, hlawh nei teuh si ang hialin a sawi zui nghe nghe. Chinese Super League hian player hlawhah sum an sen ui loh em vangin ‘player tinten an phu loh hlawh an nei vek’ ti hiala sawi pawh an awm. 
 Carlos Tevez, Hulk leh Oscar ten an khelh lai hian Chinese Super League pawhin ngaihven a hlawh thar hluai a, inkhel entu pawhan tamin, khelmualah an khat thup thin. 
Hun a kal hret a, China-ah football boruak a dai telh telh. Covid 19 hripuiin nasa takin a nuai a, inkhuahkhirhna khauh leh khawng tak an kalpui vangin football boruak a hniam leh zual. Hripui an tawrh nasat em vangin an economy in a tuar viau bawk a, an football club ropouite pawhin leiba an nei ta ten tun. An boruak a len hluai laia an club lian leh hlawhtling tak pakhat Guangzhou Evergrande phei chuan leiba £240 billion zet an nei tling ta hial. Leiba an ngah em vang hian an khelmual mipui  100,000 zet lenna chu thiah darh a ni ta hial a ni.
Covid 19 hripuiin na taka a nuai hnuah football khelh theih ni mah se entu an nei hleithei ta mang lova, khelmual a ruak huai ta deuh zel. Hripuiin a nuai bakah World Cup 2022 khel turin an tling lova, Fifa ranking-ah 78-naa an tlakhniam bakah hmeichhe lamah pawh top 10 huanga an awm phak loh leh zel vangin an hnual rawih rawih a, 2016 vela pawr tak kha tunah chuan an zuih ral a ni deuh der tawh.
China hian football-ah ropui tumin ngaihtuahna pui leh turu tak an nei a, an suangtuahna namen lo tak vangin an pawr hluai bawk. Naupang thil thar nei ang maiin phur hluai mah se ruahmanna tha leh daih rei an neih that tawk loh an tuar a. A ki an la sang nghal lutuk a, an zo leh meuh si lo chuan a vaw let a, an tuar zui ta a ni. Suangtuahna ropui tak neih a, a taka ruahmanna tha neih leh si loh hi a hlauhawm hle a lo ni.
2015-16 velah Chinese Super League boruak a lian thar hluai ang maiin tunah Saudi Pro League in boruak a rawn nei leh ta hluai a. Hlawh a tam em vangin player uaithla tawh lamin Saudi Pro League an bawh leh zual. Cristiano Ronaldo leh Karim Benzema te pawh pawhin Saudi Arabia an pan ta hial chu a ni a. Chinese Super League ang thoin Saudi Pro League pawh hi an pawr zuih ve leh mai ang em tih chu hun in a hril chiang thuai tura ngaih a ni.