Saka album thar ‘Thlasik Kawng’ July 18-ah

On Jul 4, 2025 33 0

Saka album thar ‘Thlasik Kawng’ July 18-ah
Mizoram rimawi khawvela kum 2022 atanga kan hmelhriat tan, Mizo Idol Season 7 star Saka chuan a album pahnihna ‘Thlasik Kawng’ tih chu July ni 18-ah a tlangzarh dawn ta. Tunlaiah zaithiamte album thar ngaihthlak tur a awm tawh mang loh laia Saka’n a studio album pahnihna a tlangzarh thei turin a zai ngainatute tan a phurawm lo thei lo.
Saka hi Mizo Idol Top 10-ah inhlangkaiin, he zaithiam thlanna show zawh hnuah pawh ama hlaphuah ngei hmangin music video a siam chhunzawm ta zel a, 2023 khan a studio album hmasa ber ‘Suangtuahna Mawlmang’ tih a tlangzarh a, he album hi Mizo Idol star tho Hmangaihi nena an sak dun, hla hit zet mai ‘Ka Chelh Ding Lo’ng Che’ tih awmna album kha a ni.
Saka hian talent a nei tha a, tuna a album thar turah pawh hian ama hlaphuah vek a dah dawn a, hla pakua awmin, lengzem leh lenglawng a inpawlh a, a album-ah hian music video pahnih awmin, a dang chu audio vek a ni ang a, ama YouTube channel-ah pawh a dah nghal dawn a ni.
A album pahnihna title atana a hman ‘Thlasik Kawng’ tih hi kan chenna Lei (Earth) awmna Milky Way Galaxy hming chawia a tih niin a sawi a, album-ah hian zaithiam dang BZi Tochhawng leh Dear Joe te nena an zaihona pawh a awm dawn a, album-a hlate hi mahni inenletna, hmangaihna hlutzia, hmangaihna zinkawng bumboh dan leh puitlinna lam panna rahbi tuk a tul avanga mihring nun thlir dan lo danglam theih dan tarlanna hla te a awm ang.
He album atana audio lam chi zawng zawng- music, recording, mixing leh mastering te Zuala Jahau (Aeris Records) kutchhuak vek a ni a, video hi WowV Production kutchhuak niin, artwork leh branding chu Dawlrem Creatives kuthnu a ni ve thung.
‘Thlasik Kawng’ tlangzarh pual hian The Warehouse Cafe, Folkland Park-ah show neih tumin Saka hi a inbuatsaih mek bawk a, he show-ah hian Mizo zaithiam hrang hrang te pawh inlan thei tura beisei an ni.
Saka chuan he album a hlate hi a thinlung chhungril ber atanga a phuahte a nih avangin a tan a hlut thu leh, a ngaithlatute pawhin an hriatthiampui a, an hlutpui ve ngei a beisei thu a sawi a, he album atana hla a phuah lai hian hringnun hi tu tan mah hian a tluang reng thei lo a, harsatna emaw vanneihna emaw kan chan tam tak te hi nakina zirlai hlu tak min zirtir tu an lo ni fo a. Vawiina kan mittui far te hi nakina kan lawmna tur a lo ni zawk a, thil tam tak kan enliam leh kan hmuh hmaih te hi kan tana awmze thuk tak la nei tur te an lo ni thei bawk tih te a chharchhuak niin a sawi bawk.